Podo aprender a durmir coma un bebé?
Resumindo, si, si podes. Durmir xa non é o misterio que era antes, e tes ao teu alcance posibilidades practicamente ilimitadas para crear o teu ambiente ideal para o descanso.
Unha mellora dos hábitos leva a unha mellora do sono
Probablemente xa saibas que o exercicio fai que durmas mellor. Isto está demostrado. Entre outros beneficios, o exercicio favorece a produción no cerebro dunha substancia química chamada adenosina. Esta marabillosa substancia non só nos fai sentir máis cansos, senón que tamén favorece o sono profundo. Tamén se ten comprobado que co exercicio libéranse unhas hormonas, as endorfinas, que nos fan sentir ben, máis satisfeitos e felices. É importante, non obstante, non facer exercicio xusto antes de ir para a cama. O máis probable é que esteas excitado e che custe adormecer.
Non leves o móbil para a cama
Hai outros hábitos que poden influír negativamente no sono. Tal é o caso do café, o alcohol, o tabaco ou o uso do móbil ou o portátil na cama.
O problema dos móbiles e os portátiles é a luz que irradian. Esta luz azul engana o corpo e faille pensar que é hora de espertar, o que dificulta quedar durmido. A luz artificial (ou calquera tipo de luz) detén a liberación de melatonina, que é a hormona natural deseñada para facernos sentir cansos.
Que pasa co café? E co tabaco?
É por todos sabido que a cafeína do café dificulta o sono. Mesmo unha soa cunca de café pola tarde pode abondar para que nos resulte imposible adormecer. Por outro lado, o alcohol relaxa o corpo e fai que o sistema nervioso vaia máis lento. Isto é bo, non? Pois non. O corpo pode ter que pasar toda a noite loitando contra os efectos negativos do alcohol. Así que, no canto de descansar, ten que seguir traballando. Dado que o alcohol tamén relaxa os músculos da gorxa, fainos máis propensos aos ronquidos.
Ademais, sábese que aos fumadores lles custa máis adormecer e durmir de maneira continua. A nicotina do tabaco afecta o corpo de moitas maneiras. Como ocorre co alcohol, adoita evitar que o corpo se relaxe por completo.
Seis pasos para mellorar a calidade do sono
Hai 6 factores que xogan un papel fundamental na calidade do sono nocturno e que, polo tanto, afectan á enerxía, á saúde e á felicidade ao día seguinte.
Paso 1
O primeiro paso, a comodidade, tamén é o máis importante. Un colchón cómodo, unha almofada axeitada á posición na que se dorme e o edredón correcto son esenciais para durmir ben. Deberás escoller unha cama firme ou branda dependendo da posición na que durmas. A elección da almofada tamén é moi persoal. Debe axustarse aos teus gustos, pero tamén á posición na que dormes e ao tipo de colchón.
Paso 2
O segundo factor é a luz. O dormitorio debe estar o máis escuro posible, o que ás veces é máis fácil de dicir que de facer. As cortinas e os estores opacos poden supoñer unha gran diferenza, xa que impiden a entrada da luz natural e das luces da cidade. Se nada máis funciona, un anteface pode servir. Outra cousa que debe terse en conta é a cor da luz. A luz cálida é a máis axeitada para ir para a cama. Unha bombilla de intensidade regulable coa que poidas controlar a calidez da luz pode ser unha boa inversión.
Paso 3
A temperatura é o seguinte factor que hai que ter en conta. A temperatura perfecta para o dormitorio é entre 16 e 17 °C. Non obstante, un valor entre 13 e 20 °C é axeitado.
Paso 4
O son é o seguinte factor dos seis máis importantes para un bo descanso. O dormitorio debería ser un oasis de calma. Un lugar protexido dos sons non desexados e intrusivos que poden interferir co descanso nocturno. Evitar a entrada de son pode supoñer unha auténtica dificultade. Os elementos decorativos suaves, como as cortinas pesadas e as alfombras grosas, axudan a illar o dormitorio e amortecen as vibracións.
Paso 5
A calidade do aire é o quinto factor. En moitos lugares do mundo evitar a contaminación no fogar non é nada doado. Xa que pasamos tanto tempo na cama, evitar a contaminación no lugar no que durmimos aínda é máis importante. Un ventilador, unha unidade de A/C, un purificador de aire ou algunhas plantas verdes (a poder ser aloe vera ou planta araña) marcan a diferencia. Tamén é importante que o aire da zona onde se durme non sexa demasiado húmido. O exceso de humidade no ambiente evita que o corpo evapore a súa humidade, o que nos fai sentir unha calor pegañenta desagradable.
Paso 6
En último lugar están as cores e elementos decorativos, que, non obstante, son igual de importantes. Como xa saberás, as cores afectan a nosa mente de moitos xeitos. Os mellores dormitorios, é dicir, os máis relaxantes son azuis, amarelos e verdes. Cales son as peores cores para durmir? O morado.
No referente aos elementos decorativos no dormitorio, as pautas son claras. Opta pola sinxeleza e a orde. Canta máis orde, máis probabilidades terás de durmir ben. E de sentirte ben ao espertar.
