5 receitas de Nadal saudables para que te sigas coidando
Este Nadal queres gozar e coidarte ao mesmo tempo? Aínda que non o creas, é máis que posible. Para conseguilo só terás que apostar por pratos con alimentos de calidade, menos procesados e máis naturais. Anota estas receitas de Nadal saudables e deixa de preocuparte polos excesos propios destas datas.
Comer san non está rifado co sabor, e os pratos que che propoñemos a continuación son a proba diso. Como has ver, só terás que prestar un pouco máis de atención aos ingredientes que elixas para os teus pratos. Cal é a clave para un menú de Nadal san e lixeiro? Que a cor das túas receitas a poñan as verduras e as froitas! É moito máis fácil do que parece, así que saca o chef que levas dentro, e imos aló! Seguro que máis dun familiar se sorprende cando lle expliques que todas as delicias que está a degustar son 100 % saudables.
Iso si, antes de empezar coas receitas saudables de Nadal, queremos lembrarche o importante que é aproveitar a comida ao máximo, especialmente en datas coma estas, nas que adoitamos cociñar en máis cantidade. Para iso, recomendámosche que gardes todo o que sobre no frigorífico, en envases ben organizados para que se conserve correctamente e poidas consumilo nos próximos días.
1. Roliños de salmón con vexetais
Ingredientes:
- Filloas integrais
- Salmón afumado
- Eiruga
- Herba dos cóengos
- 1 iogur grego natural
- Aceite de oliva virxe extra
- ½ limón
- Alfábega
- Allo en po
- Pementa
- Sal
Preparación:
1. Bota o iogur nun cunco e mestúrao co zume de medio limón, un chorriño de aceite de oliva virxe extra e sal. Consello: dálle un toque extra cunhas especias ao gusto.
2. Reméxeo todo ben ata conseguires unha salsa homoxénea.
3. Tendo en conta o número de comensais que seredes, coloca sobre unha bandexa ou mesado varias filloas integrais.
4. Unta unha capa da salsa sobre as filloas.
5. Cúbreas cunha capa de salmón afumado e outra de alfábega, herba dos cóengos e eiruga mesturada.
6. Enrola as filloas, córtaas en pequenos rolos e suxéitaos con escarvadentes.
7. Podes empratar sobre brotes tenros e darlle un toque especial con salsa de mostaza granulada.
2. Canapés saudables para o Nadal
Ingredientes:
- Pan integral
- Queixo tenro de cabra
- Salmón
- Peituga de pavo á grella
- Albóndegas de polo ou vexetarianas
- Cebola morada
- Remolacha
- 1 iogur grego
- 1 cogombro
- Aceite de oliva virxe extra
- Aneto
- Pementa
- Sal
Preparación:
1. Pela o cogombro e pícao en anaquiños.
2. Mestúrao co iogur grego e engádelle un chorriño de aceite de oliva virxe extra, aneto, pementa e sal ao gusto.
3. Remexe ata conseguires unha salsa homoxénea e reserva.
4. Curta varias rebandas do pan integral e móntaas cos diferentes ingredientes.
5. Podes poñerlle unha base de queixo e despois crear combinacións ao teu gusto: de queixo, salmón e cebola morada; de queixo, albóndegas e remolacha; de pavo coa salsa de cogombro… Bótalle imaxinación!
3. Ensalada morna de cítricos
Ingredientes:
- 1 laranxa
- 1 pomelo
- 1 granada
- Bimi
- Lombarda
- Kale
- Sésamo
- Aceite de oliva virxe extra
- Vinagre de Módena
- Pementa
- Sal
Preparación:
1. Lava as verduras.
2. Quenta unha tixola a lume medio cun chorriño de aceite e saltea o bimi, a lombarda e o kale ou col rizada.
3. Pela a laranxa e o pomelo e párteos en cuarteiróns.
4. Abre a granada e sácalle as sementes.
5. Mestura as verduras coas froitas no prato e adereza con aceite de oliva virxe extra, vinagre, pementa e sal.
6. Ponlle o toque final co sésamo.
4. Pastel de pataca e salmón
Ingredientes:
- 4 filetes de salmón
- 6 patacas
- 3 ovos
- 1 cebola
- 250 ml de leite
- 250 g de queixo fresco
- Aneto
- Pementa
- Sal
Preparación:
1. Pela as patacas e párteas en rodas finas.
2. Pon as patacas nun recipiente para microondas con tapa. Bota media cullerada de aceite de oliva virxe extra e salpementa ao gusto.
3. Mestúrao todo ben, tapa o recipiente e cociña no microondas durante 2 minutos a 800 W.
4. Sácao, remove e repite o proceso ata que estean tenras.
5. Pica a cebola en dadiños pequenos (en brunoise, como dirían os profesionais) e rústrea na tixola.
6. Cociña os filetes de salmón á prancha.
7. Prequece o forno a 180 ºC.
8. Bate o leite cos ovos, o queixo e un pouco de pementa.
9. Nunha prata grande, vai alternando unha capa de pataca e cebola e outra de salmón (previamente cortado en anacos).
10. Pon un pouco de aneto por riba e cubre todo coa salsa de leite, ovos e queixo.
11. Enforna durante 40 minutos, e listo para servir!
5. Albóndegas de verduras con salsa de aguacate
Ingredientes:
- Albóndegas de verduras
- 1 cebola morada
- Brotes tenros
- Espárragos verdes
- 1 cenoria
- 1 aguacate
- Zume de ½ limón
- Aceite de oliva virxe extra
- Auga
- Allo en po
- Pementa
- Sal
Preparación:
1. Abre o aguacate e baléirao. No vaso do batedor, pon o aguacate, o zume de medio limón, unha culleradiña de aceite de oliva virxe extra, allo en po ao gusto, pementa e sal.
2. Báteo ben e, se cómpre, engade auga para que a salsa non quede demasiado espesa. Garda nun bote de vidro e reserva.
3. Lava os brotes tenros.
4. Pela a cenoria e córtaa en tiras cun pelador.
5. Pica a cebola morada en rodas moi finas.
6. Quece nunha tixola un chorriño de aceite e fai os espárragos verdes á prancha.
7. Cociña as albóndegas de verduras.
8. Nun prato, pon unha cama de brotes e espárragos. Sobre ela, coloca a cebola, as tiras de cenoria e, finalmente, as albóndegas.
9. Sirve a salsa á parte para que cada comensal a engada ao seu gusto.
Cal destas receitas che gustou máis? Sexa cal for, calquera delas axudará a coidarte este Nadal. E lembra, non desperdicies nada de comida!
Para terminar, aquí deixamos algúns artigos con consellos para este Nadal gozares da comida de forma sa e sostible. Toma nota!
Encántanos que os clientes utilicen os nosos produtos dunha forma creativa. Atrévete ti tamén! Porén, debes ter en conta que as modificacións e cambios que introduzas nos produtos de IKEA impiden que se poidan volver vender ou empregar para o seu uso orixinal, polo que invalidan as garantías comerciais de IKEA e o dereito a devolución.
