Ideas orixinais para personalizar o armario IVAR.
O armario IVAR dá moito xogo á hora de personalizalo. O piñeiro macizo sen tratar ofrece moitas posibilidades (pódese pintar, tinguir, perforar, etc.). Por iso, encántanos facer cousas creativas con el. Bótalle unha ollada a algunhas das ideas que se nos ocorreron ata o de agora. Dende pintalo ata engadir máis zonas de almacenamento adaptadas ás túas necesidades. Dámosche unhas cantas alternativas fantásticas!
Tes un armario IVAR e queres darlle un toque persoal? Tanto ten se o acabas de mercar ou se leva varios anos contigo e queres renovalo, estas opcións serviranche de inspiración para conseguir unha peza única. Empezamos...
1. Solucións de almacenaxe para xogos
Es amante dos xogos de mesa? Entón, estas solucións de almacenaxe son ideais para ti, xa que con elas poderás ter en orde o material de ocio de toda a familia, sobre todo na sala de estar.
No interior das portas puxemos uns ganchos para os auriculares, un cesto para os mandos e un portapapeis para o reconto de puntos. Tamén aparafusamos un revisteiro de contrachapado ao lateral do armario para gardar as tabletas. Todo listo para a próxima partida!
2. Un toucador
Si, como o les: co armario IVAR podes crear un orixinal toucador para amañarte e así non ocupar o baño durante tanto tempo.
Nós fixémoslles un burato ás portas no centro para ter algunhas cousas gardadas e outras á vista. Deseguido pintamos o interior e o exterior para dar un toque de contraste. Nun lateral puxemos un espello extensible para vernos ben mentres nos amañamos e, como toque final, engadimos unha grilanda de luces para darlle aínda máis encanto. Que che parece?
Como no caso anterior, tamén se lle poden engadir cestas de almacenaxe se for necesario.
3. Armarios IVAR convertidos nun mural
Nesta ocasión utilizamos catro armarios IVAR, perfectos se necesitas gardar moitas cousas.
Unha vez colocados, pintamos nas portas un mural grande en cores pastel e dentro dun deles puxemos unha guía para colgar as obras de arte e as brochas. Nós decidimos por poñer ganchos con pinza, mais podes poñer perchas se queres.
No entanto, isto só é unha idea, podes utilizar este tipo de guías para pendurar o que necesites.
4. Un louceiro
Necesitas espazo de almacenamento extra na cociña? Crea un pequeno louceiro cun armario IVAR. Nós pintamos o armario por fóra de cor azul (tamén unha parte da parede para crear un efecto de continuidade) e forramos o panel traseiro con xornais para darlle un toque vintage. No interior das portas puxemos ganchos e cestos.
Como ves, neste louceiro pódense gardar moitas cousas, pero se aínda necesitas máis espazo, podes complementalo con caixóns para colgar, como o modelo TROFAST.
5. Armario para o dormitorio
Con catro armarios IVAR enriba de dúas cómodas fixadas á parede, podes conseguir un armario moi espazoso para o dormitorio.
O toque creativo pono o deseño, feito cuns modelos e pintura negra. Por suposto, o ideal é adaptalo aos teus gustos e o estilo do dormitorio. Neste sentido, o mellor é escoller cores e formas que combinen ben. Ti elixes!
6. Unha casa de bonecas secreta
Aos peques da casa chamaralles moito a atención, e o mellor é que lles axudará a telo todo moito máis recollido.
Para esta casa só necesitas un papel bonito no fondo e colgadoiros de cores nas portas. Como guinda, a pesar de que o armario está fixado á parede, nós puxémoslle unha pata cun calcetín para darlle un toque máis divertido. Cando acabes con isto, mete os xoguetes e andando!
Cal destas ideas che gustou máis? Se che sorprendeu todo o que se pode facer cun armario e queres seguir vendo ideas para renovar o teu fogar cos mobles que xa tes, velaquí deixamos unha selección de artigos que che poden interesar.
Encántanos que os clientes utilicen os nosos produtos dunha forma creativa. Atrévete ti tamén! Porén, debes ter en conta que as modificacións e cambios que introduzas nos produtos de IKEA impiden que se poidan volver vender ou empregar para o seu uso orixinal, polo que invalidan as garantías comerciais de IKEA e o dereito a devolución.
