6 ideas doadas para organizar a túa almacenaxe
A función principal dos espazos de almacenaxe é manter a orde e contribuír a que a casa estea despexada. Se ese non for o caso e cres que, máis ben, só fan que todo semelle máis caótico, apunta! Dámosche varias ideas para organizares a túa almacenaxe e tirarlle o máximo partido.
1. Pono á vista
É bastante habitual acumular moitas cousas sen orde en espazos de almacenaxe como caixóns ou caixas. Como non se ven, non se lle dá moita importancia e aínda que pode que ao principio procures telos colocados, co tempo adoita acabar por mesturarse todo, non é?
Por iso, propómosche apostar pola almacenaxe transparente, como tarros de vidro, para gardar aqueles elementos que poidan estar á vista, como uns pinceis, material de costura, xoias, maquillaxe ou o que se che ocorra. O efecto pode ser moi estético e o feito de que se vexan animarate a mantelos sempre organizados e presentables. Anímaste a probar?
2. Divide por compartimentos os teus caixóns
Como sinalamos no punto anterior, é frecuente que se lle dea pouca importancia á orde dos caixóns porque non sempre están á vista. Desa forma poden terminar sendo unha chea de cousas sen sentido, que che complica a vida cada vez que intentas buscar algo. Ademais, esa dificultade para ver o que tes nos caixóns pode levarte a pensar que non tes algunhas cousas e mercar novas innecesariamente.
Se queres evitar isto, recomendámosche que apostes por bandexas, caixas e divisores. Podes aplicalo en case todos os caixóns das diferentes estancias da casa: para organizar a roupa, o teu material de escritorio, o papelame, os cubertos da cociña, os produtos do baño, as ferramentas…
Grazas a isto conseguirás un efecto de orde moito maior nos teus caixóns e atoparás todo facilmente.
3. Cestas para organizar a despensa
A despensa é outro deses lugares de almacenaxe que pode converterse nun desastre se o descoidamos un pouco. Por iso, unha idea que pode virte moi ben é utilizar cestas ou caixas a modo de compartimentos para ter todo moito mellor organizado.
O mellor é que o fagas en función do tipo de alimento (legumes, cereais, aperitivos…); así terás todo mellor localizado e á vista semellará un espazo moito máis ordenado.
Ademais, cada vez que teñas que limpar o armario, o proceso será moito máis sinxelo porque non terás que sacar un a un os produtos, senón que chegará con sacar as cestas. Faino doado!
E se tiveres dúbidas, velaquí tes un vídeo no que atoparás todos os consellos que necesitas para organizares a túa despensa nun chiscar de ollos.
4. Aproveita o espazo inferior dos estantes
Cómpreche máis espazo? Podes conseguilo utilizando o espazo inferior dalgún dos teus estantes. Para iso só terás que engadir uns ganchos debaixo desta e utilizalos para colgar o que necesites. Por exemplo, a modo de colgadoiro de roupa.
Iso si, é importante ter en conta que hai espazo abondo para o que queres colgar, porque senón pode saturar moito e dar a sensación de desorde, que é xusto o contrario do que buscamos con estes trucos.
5. Xa non cabe nada máis nos teus mobles do baño? Pendúrao!
Se o teu armario do baño ou os teus caixóns xa non admiten nin un produto máis, isto é para ti! Deixa a un lado a crenza de que todo debe estar gardado e pendura todo o que poidas para aforrar espazo. Só necesitarás poñer un colgadoiro ou uns ganchos para colgar o que quixeres. Non te preocupes se non podes tradear, hai opcións de colgadoiros para portas como TJUSIC que só terás que colocar. O noso consello é apostares por colgar esas cousas que utilizas a diario e que poden estar fóra, alén de espazo, aforrarás tempo porque as terás máis á man.
6. Organiza o teu recuncho de almacenaxe para a coada e di adeus ás moreas de roupa
Adoitas amorear a roupa para pasar o ferro sobre unha cadeira ou en calquera outro recuncho? Se é así, é probable que cada vez que o vexas intentes mirar para outro lado e odies esta tarefa.
O noso consello é apostar por crear un recuncho máis ordenado no que poidas gardar a roupa sucia ou limpa facilmente, para que a coada non contribúa a crear máis desorde. Podes optar por un pequeno moble de caixóns, unha cómoda ou poñer ganchos para colgar a roupa limpa e que non se engurre. Iso si, recomendámosche que non sexa un espazo de almacenaxe moi grande, para non adiares demasiado a tarefa de pasar o ferro.
Tamén podes incluír un caldeiro ou cesto bonito para a roupa sucia. Se o pensas, o espazo para pasar o ferro non ten por que ser unha parte desorganizada ou pouco estética da túa casa.
Tomaches nota? Esperamos que con estas ideas consigas un ambiente ordenado e cargado de paz para o teu fogar.
Encántanos que os clientes utilicen os nosos produtos dunha forma creativa. Atrévete ti tamén! Pero ten en conta que cambiar ou modificar os produtos de IKEA de forma que non se poidan revender ou usar para os seus fins orixinais significa que se perderán as garantías comerciais de IKEA e o teu dereito a devolver os produtos.
