Saltar

Proba as receitas de IKEA

E descubre unha fusión de deliciosos sabores. Ensaladas, rolos, burritos e pratos que combinan salmón, ostras e gambas con saborosos espárragos e outros alimentos. Comidas saborosas, saudables e sostibles para toda a familia.

Dúas persoas preparando unha ensalada con porros, follas de espinaca, cenorias e col.
Dúas persoas preparando unha ensalada con porros, follas de espinaca, cenorias e col.

Cociña con IKEA: albóndegas de proteína vexetal con salsa de iogur e remolacha

Tempo de elaboración: 30 min

Tempo de espera: 120 min

Ingredientes para 4 comensais

1 bolsa de albóndegas de proteína vexetal HUVUDROLL
30 ml de aceite de oliva virxe
Sal fino

Para a salsa:

4 cogombros
500 g de salsa de iogur
1 presa de menta
1 g de pementa negra
2 limas
1 dente de allo

Para a gornición:

1 presa de alfábega fresca
4 remolachas
32 tomates cereixa
5 g de sal de escamas

Preparación

1. Prequecemos o forno a 200 °C.

2. Unha vez alcanzada a temperatura desexada, colocamos os tomates cereixa nunha bandexa para enfornar, deixamos que se asen uns 15 minutos e reservámolos.

3. Agora é a quenda da remolacha. Colle cada unha individualmente e envólveas en papel de aluminio.

4. Coloca as 4 remolachas envoltas e deixa que se asen durante unha hora aproximadamente á mesma temperatura de antes (200 °C). Cando estean listas, resérvaas.

Para elaborar a salsa:

5. Pela todos os cogombros e rélaos. Agora, bótaos nun coadoiro e sálgaos.

6. Déixaos escorrer uns 30 minutos e, pasado ese tempo, sécaos ben coa axuda dun pano de cociña.

7. Rela o dente de allo.

8. Nun cunco, mestura todos os ingredientes da salsa: o cogombro escorrido, o iogur grego, o allo relado, as 2 limas espremidas, a menta e a pementa. Déixao repousar.

Para elaborar o aceite da gornición:

9. Para facer o aceite de alfábega: verte no bote do batedor o aceite e a presa de alfábega (reserva un chisco para despois) e tritúrao todo ben ata que non queden tropezóns das folliñas. Déixao repousar.

Empratado

10. Cociña as albóndegas no forno entre 10 e 12 minutos a 200 °C.

11. Corta as remolachas asadas en dúas metades.

12. Adereza o prato co aceite que preparamos antes, unhas escamas de sal e un pouquiño de pementa negra (a cantidade ao gusto, claro).

13. Lembras a alfábega que apartaches antes? É o momento de utilizala para acabar de servir estas deliciosas albóndegas. Colócaa polo prato e listo!

Coñece o chef e máis consellos sobre esta receita.


Cociña con IKEA: ensalada de arenques mariñados

Tempo de preparación: 25 min.

Ingredientes para 4 comensais

2 tarros de arenques mariñados SILL DILL
1 anaco de queixo OST PRÄST
2 patacas grandes
2 tomates de ensalada
1 bolsa de leituga variada
1 lata de pemento morrón asado (pode ser en liscos ou podes cortalo á man)
1 dente de allo
Viño branco
Aceite de oliva virxe extra
Vinagre de viño branco
Mostaza SENAP GROV
Comino
Sal
Azucre

Preparación

1. Pomos a cocer as dúas patacas nunha pota. Lembra introducilas limpas e sen lles quitar a pel.
2. Entrementres, preparamos un cazo cun chisco de aceite.
3. Esmagamos un dente de allo e botámolo no cazo para que vaia dourando.
4. Engadímoslle os liscos do pemento asado ao aceite e o allo, e deixamos que súen un pouco. Lembra ir movendo para que quede todo ben mesturado.
5. Agora engadimos un chisco de sal e, máis ou menos, unha cantidade semellante de azucre para reducir a acidez dos pementos.
6. Botamos un chorriño de viño branco e deixamos que o alcol vaia evaporando mentres se acaban de cociñar o resto de ingredientes.

Elaboración da vinagreta

7. Separamos un par de filetes de arenques do noso tarro de arenques mariñados.
8. Deseguido, marcámolos coa axuda dun soprete. Abonda cuns segundos por cada lado. Non te preocupes! Este paso tamén se pode facer cunha tixola, das de toda a vida.
9. Unha vez que estean feitos, pasámolos a un cunco de cristal e desfacémolos un chisco coa axuda dun garfo, tamén dos de toda a vida.
10. No mesmo recipiente, engadimos unha culler pequena de mostaza e mesturamos ben.
11. Vertemos dúas partes de aceite de oliva e unha de vinagre.
12. Para o detalle final, engadimos un chisco de comino.
13. Agora emulsionámolo todo.

Acompañamento

14. Cortamos o tomate en rodas (grosor ao gusto de cada persoa) e reservamos.
15. Agora facemos o mesmo co queixo. Cortámolo en triángulos, que volvemos cortar pola metade.
16. Lembra retirar a pataca cando estea cocida e córtaa en rodas, como o resto dos alimentos.

Empratado

17. Sobre un prato chan, colocamos a mestura de leituga (lavada previamente) por toda a superficie.
18. Enriba da leituga imos pór unha cama de pataca.
19. Engadimos os anacos de tomate e queixo, os pementos en liscas e o resto de filetes de arenques mariñados que tiñamos no tarro.
20. Agora ímoslle dar o toque distintivo a esta receita. Óscar proponnos volver empregar o soprete para marcar un pouco os filetes. Se non tiveres un soprete co que facelo, podes utilizar unha tixola antes de poñelos na ensalada.
Por último, aliñamos coa vinagreta que tiñamos reservada.

Coñece o chef e máis consellos sobre esta receita.


Cociña con IKEA: ensalada de gambas con chutney de laranxa

Ingredientes para 4 comensais

1 bolsa de gambas peladas conxeladas SJÖRAPPORT (que cómpre desconxelar previamente)
1 bolsa de preparado para pan ácimo KNÅDA
10 g de curry
220 g de marmelada de laranxa e flor de sabugueiro
50 g de salsa de rabo picante
75 g de iogur grego
30 ml de aceite de oliva
5 g de xenxibre
70 g de cebola vermella
30 ml de vinagre de mazá
5 grans de pementa negra
5 grans de coriandro
Coandro (ao gusto)

1. Dentro do mesmo paquete de preparado, engadimos 50 ml de aceite de oliva.
2. Deseguido, coa axuda dunha xerra ou botella de cristal, verte 200 ml de auga.
3. Selamos o paquete co peche que vén por defecto.
4. Agora, mantén a bolsa recta e amasa a mestura ata obter unha pasta lisa (durante uns 5 minutos aproximadamente).
5. Despois, saca a pasta do paquete e divídea en anacos redondos, tipo boliñas. Se o vas servir como aperitivo, procura que non sexan anacos moi grandes.
6. Pon unha tixola a quecer.
7. Antes de cociñar cada porción, dámoslle un pouco de forma esmagando coa palma da man a masa de xeito que quede plana. Consello: Podes axudarte dunha táboa de cortar de madeira para poñelas enriba e ir aplanándoas coas dúas mans.
8. Cocíñaas unha a unha na tixola ata que teñan o punto torradiño que desexes (cuns 3 min será dabondo). Pódeslles ir dando a volta cunhas pinzas de cociña ou unha espátula.
9. Cando as teñas todas, saca cada filloa e colócaas nun prato. Despois, cúbreas cun trapo ou pano de cociña húmido para que se manteñan esponxosas.

Preparación da salsa de ravo

10. Nun cunco de cociña, mesturamos a salsa de ravo que temos no bote co iogur.
11. Coa axuda dunha simple culler, remexemos todo ben para mesturar ambos ingredientes.
12. Unha vez integrados, gardamos a mestura nun biberón de cociña e metémolo na neveira ata que teñamos que servila na ensalada.

Preparación do chutney de laranxa

13. Empezamos dourando as especias (pementa e coandro) a lume medio nunha tixola.
14. Cortamos e picamos a cebola morada.
15. Pelamos o xenxibre e picámolo. Se che resulta máis doado, tamén podes relalo.
16. Cando as especias estean douradiñas, engadimos o aceite de oliva, a cebola e o xenxibre.
17. Rustrimos a lume medio ata que a cebola estea case transparente.
18. Agora engadimos a marmelada de laranxa e o vinagre de mazá.
19. Cociñamos todo ata que colla consistencia.

Empratado

20. Colocamos unha das porcións de pan como base.
21. Botamos unha capa da nosa chutney de laranxa.
22. Engadimos unha presada de gambas (lembra desconxelalas previamente)
23. Engadimos a salsa de ravo e iogur por riba.
24. Rematamos cun pouquiño de coandro picado.
25. Repetimos o proceso con todas as demais racións.

Coñece o chef e máis consellos sobre esta receita.


Cociña con IKEA: albóndegas de verduras con crema de cabaza e ricotta

Dificultade: baixa

Tempo de preparación: 25min.

Ingredientes para 4 comensais:

1 paquete de HUVUDROLL de verduras

3 culleradas de aceite de oliva virxe extra

½ porro

2 dentes de allo

800 g de cabaza

50 g de xenxibre

400 ml de leite de coco

200 g de anacardios

Zume dunha lima

3 g de fermento fresco

Sal

Preparación

1. Primeiro pomos uns anacardios nun cunco grande e deixámolos a remollo a temperatura ambiente durante dúas horas.
2.Limpamos a cabaza e cortámola en anacos pequenos.
3. Agora, nunha tixola quente sofriximos a cabaza cun anaco de aceite de oliva durante uns 5 min. Cando estea ben dourada, sacámola e reservamos.

Elaboración da crema quente

4. Primeiro, faremos o rustrido para a crema que acompañe a nosa receita. Para iso habemos utilizar allo, xenxibre e porro.
5. Picamos cun coitelo estes tres ingredientes (allo, xenxibre e porro). Consello do chef: non é necesario que o picado sexa moi fino, xa que despois irá todo triturado.
6. Entrementres, a lume medio, imos preparando a pota cun chisco de aceite.
7. Engadimos os 3 ingredientes que picamos e mesturámolos ben.
8. Cando estean dourados, engadimos unha parte da cabaza que reserváramos. Lembra reservar un pouco para o empratado final.
9. Reducimos un pouco o lume e incorporamos o leite de coco.
10. Tápao e cocíñao todo durante uns 40 min.
11. Cando estea todo cociñado, tritúrao cun batedor ou robot de cociña.

Como facer ricotta vegana con anacardios

12. Recuperamos os anacardios, que puxéramos a remollo e escorrémolos. Podes empregar un coador para que sexa máis fácil que non escape ningún.
13. Botámolos nun robot de cociña ou nun batedor. Engadimos un chisco de sal, 3 g de fermento fresco e o zume dunha lima. Tapamos e trituramos ben ata conseguir a textura desexada.

14. Reservamos no frigorífico ata o momento de empratar.

Preparación das albóndegas de verduras

15. Fritimos as albóndegas a lume medio, sen desconxelar, nunha tixola cun chisco de aceite. Aproximadamente uns 10 min.

Empratado

16. Empregamos un prato sopeiro.
17. Creamos un círculo coas albóndegas.
18. Colocamos a cabaza que tiñamos reservada xusto no centro do prato.
19. Vertemos a crema quente ata que cubra a metade das albóndegas.
20. Por último, engadimos unha bóla pequena de ricotta de anacardios por riba.

Coñece o chef e máis consellos sobre esta receita.


Cociña con IKEA: salmón en salsa de laranxa

Dificultade: media/baixa

Tempo de elaboración: 30 min.

Ingredientes para 4 comensais:

1 paquete de filetes de salmón SJÖRAPPORT

600 g de patacas novas (medianas-pequenas)

500 g de espárragos verdes

3 laranxas 200 g de manteiga

100 g de azucre

200 ml de viño branco

Ceboliño ou perexil

Aneto

Sal e pementa

1. Por unha banda, cocemos as patacas (limpas e sen pelar) nunha pota durante aproximadamente uns 18 minutos.
2. Doutra banda, mentres cocen as patacas, podemos adiantar e branquear noutra pota os espárragos verdes cunha cocción rápida de 3-4 minutos.
3. Unha vez estea preparado, imos saltealo todo xunto nun wok. Engade un chisco de manteiga para lle dar ese punto dourado que tanto nos gusta. Nota: se non tes un wok, sempre podes recorrer a unha tixola das de toda a vida.
4. Pasados uns segundos de salteado, salpementamos e finalmente engadimos o aneto picado. Salteamos un pouco máis para que todo colla sabor... e xa está!

Como cociñar o salmón

5. Primeiro, coloca os 4 filetes sobre un prato ou bandexa e sálgaos un chisco. Vai con tino co sal!
6. Agora imos preparar a zona onde se vai a cociñar o peixe.
7. Derretemos a terrina de manteiga nunha tixola a lume medio-baixo. Consello do chef: se lle botas un chorriño de aceite de oliva, evitarás que a manteiga se queime.
8. Engadimos inmediatamente o azucre a lume medio-baixo para que non escureza demasiado. Con 2-3 culleradas teremos dabondo.
9. Nese "caramelo" fritimos os filetes de salmón só 1 minuto por cada lado. Non importa que non quede completamente feito porque o acabaremos de cociñar unha vez engadamos o zume de laranxa.
10. Retiramos e reservamos mentres pasamos á elaboración da salsa. Se utilizas unha espátula de cociña, será máis doado sacar todas as pezas sen perigo de romperen.

A salsa de laranxa

11. Na mesma tixola na que derretemos a manteiga e fritimos os filetes, incorporamos agora o ceboliño picado e remexemos ben.
12. Engadimos un pouco de viño branco e deixámolo evaporar.
13. Esprememos as 3 laranxas ata termos un bo vaso de zume. Cando o teñamos, engadímolo á mestura da tixola.
14. Deixámolo reducir todo un pouco.

15. Engadimos os filetes de salmón que retiraramos e deixamos cociñar todo. Consello do chef: pon a tapa da tixola para que se faga máis rápido. En 2-3 minutos estará feito. Vixía que non se faga demasiado o peixe para que non quede seco.

Coñece o chef e máis consellos sobre esta receita.


Cociña con IKEA: filloas reenchidas de nata con noces de macadamia e plátano

Dificultade: baixa

Tempo elaboración: 24 min.

Tempo de espera: 10 min.

Ingredientes para 3 comensais

1 filloa PANNKAKOR (pancake)

Nata en spray

110 g de caramelo de vainilla

100 g de nata para cociñar

1 plátano

25 g de noces de macadamia

1 pan de chocolate e laranxa

Para a salsa de caramelo:

1. Introduce a nata líquida para cociñar dentro dunha pota ou cazarola.
2. Engade os bloques de caramelo de vainilla para que se derretan.
3. Remove regularmente cun batedor manual para que quede todo ben mesturado e non se pegue a salsa á base da pota.
4. Derretemos ata termos a salsa pronta. Nota: para evitarmos sustos e problemas, pon o lume baixo. Deste xeito aseguraraste de que a nata non se corte e de que non se queime ningún ingrediente.
5. Cando a salsa estiver preparada, reservámola nun biberón para engadila máis tarde, no momento do empratado.
6. Pasamos a deixar preparados o plátano e as noces: Cortamos o plátano en rodas pequenas. Cortamos tamén as noces de macadamia.

As filloas *

7. Prequecemos o forno a uns 160 °C.
8. Colle unha filloa por cada comensal (si, quen queira poderá repetir despois).
9. Colócaas nunha bandexa e enfórnaas durante uns 4 minutos. Nota: non esquezas pór un anaco de papel de forno para que non se pegue a masa.

*Sempre tes a opción de faceres ti a masa das filloas. Só terás que mesturar ovos, fariña de trigo, leite, fermento, manteiga e un chisquiño de sal.

Como facer terra de chocolate

10. Deixar deshidratar o pan durante uns días para que se poña reseso. Tamén podes torralo un chisco no forno (durante uns 15 min e partido en anacos).
11. Cun relador ou robot de cociña, trituramos o pan de chocolate e laranxa. Tamén podes facelo cun simple morteiro dos de toda a vida. Nota: non fai falta que quede demasiado fino. Se deixas anacos máis grandes, dará unha textura máis crocante á filloa. Ah! E se tes que facelo cun batedor ou robot, aconsellámosche facelo en diferentes quendas para non saturares o aparello con demasiado pan.
12. Colocamos nunha bandexa de forno o pan relado e enfornamos a 160 °C durante uns 2 minutos aproximadamente.

Empratado

13. Sobre o molde, colocamos a masa da filloa aberta (previamente quecida no forno). Para non manchar a masa, vai unha por unha.
14. Coa axuda dunha manga pasteleira, introducimos a nata montada no interior.
15. Engadimos os anacos de plátano de forma graduada para enchela.
16. Bota os toros finos de noces de macadamia.
17. Engade a salsa de caramelo por riba do recheo de nata, plátano e noces.
18. Pecha a filloa.
19. Verte de novo un chorriño de salsa de caramelo e vainilla.
20. Por último, pon por riba da salsa un pouquiño de terra de chocolate e laranxa.

Coñece o chef e máis consellos sobre esta receita.


Cociña con IKEA: receita de albóndegas de salmón con mostaza doce e aneto

Dificultade: baixa

Tempo de elaboración: 30 min.

Tempo de espera: 3 horas

Ingredientes para 4 comensais:

1 bolsa de albóndegas de salmón e bacallau HUVUDROLL

Salsa de mostaza doce e aneto – 250 g

200 ml de nata para montar

40 g de manteiga

150 g de iogur grego

1 dente de allo

5 ml de xarope de flor de sabugueiro

40 g de cebola vermella

200 g de cogombro

20 g de ovas vexetais vermellas

Un chisco de sal

40 g de cacahuetes

Uns grans de pementa negra

Aneto fresco ao gusto

1. Primeiro preparamos a salsa de acompañamento das nosas albóndegas. Montamos a nata, que debe estar fría para que se poida montar ben e, deseguido, engadimos con movementos envolventes a salsa de mostaza doce e aneto. Unha vez mesturada, gardámola no frigorífico.
2. Saltea as albóndegas de salmón coa manteiga ata que queden ben douradas. Logo resérvaas a temperatura ambiente.
3. O seguinte paso será preparar o aderezo para a ensalada de cogombro. Nun cunco, mestura o iogur, o allo picado finamente, o xarope de flor de sabugueiro, o sal e a pementa negra.
4. Deseguido, cun pelador, corta as tiras de cogombro e a cebola fina. Finalmente, mestura todo co aderezo anterior e reserva en frío ata que o vaias servir.

Empratado:

5. Coloca unha base de ensalada de cogombro aderezada. Despois engade 5 albóndegas de salmón mornas. Rematamos coa salsa de mostaza doce e aneto, unhas ovas vexetais e un chisco de aneto fresco.

Coñece o chef e máis consellos sobre esta receita.


Cociña con IKEA: gofres con mousse de queixo

Dificultade: baixa

Tempo de elaboración: 30 min.

Tempo de espera: 20 min.

Ingredientes para 4 comensais

1 paquete de gofres VÅFFLOR (desconxelar previamente)

1 botella de xarope de arandos vermellos DRYCK LINGON

150 g de queixo de rolo de cabra

75 g de nata de montar

68 g de mel de flores

25 g de chocolate branco BELÖNING

Preparación da mousse de queixo

1. Quentamos a nata líquida para montar nunha pota ou cazarola.
2. Sobre unha táboa de cortar, dividimos os rolos de queixo en medallóns.
3. Engadímolos á pota para derretelos coa nata.
4. Imos removendo suavemente cun batedor manual para que non se queime nin se amarre ao fondo.
5. Unha vez derretido, reservamos en frío uns 20 minutos.

Preparación dos gofres

6. Prequecer o forno a uns 160 °C.
7. Cando estean desconxelados os gofres, poñelos sobre unha bandexa de enfornar. Consello: lembra pór un pouco de papel de forno debaixo para que non se peguen.
8. Deixar enfornar durante 5 minutos.

Empratado

9. Sobre un prato plano, debuxamos un fío coa mousse de queixo.
10. Xusto enriba poñemos en ringleira os gofres previamente quentados.
11. Cubrimos con outra capa de mousse por riba dos gofres.
12. Agora toca engadir o xarope de arandos vermellos. Consello: será máis doado de servir se pasas o xarope a un biberón.
13. Engade unha cullerada de mel de flores.
14. Por último, coa axuda dun relador, cortamos uns anacos finos de chocolate branco.

Coñece o chef e máis consellos sobre esta receita.


Amantes do peixe

Confit de salmón con fiúncho servido nunha fonte branca para forno, visto dende arriba.

Confit de salmón con fiúncho e alioli

Salmón cociñado coidadosamente a lume lento, cunha ensalada fresca e alioli.

Para 4 persoas Tempo: 45 min

500 g de filetes de salmón SJÖRAPPORT, cortados en cubos de 1,5 cm
2 culleradas de sal + algo para condimentar
1 cullerada de azucre
4 follas de loureiro
4 ramiñas de tomiño
1 cullerada de sementes de fiúncho
4 dentes de allo
100 ml de olivas negras
1 culleradas de sementes de coandro
1/2 limón, pel relada e zume
500 ml de aceite de oliva virxe extra
2 fiúnchos
12 coles de Bruxelas
1 puñado de rabos con follas, lavados
4 ramiñas de aneto cortadas en anacos grandes
4 culleradas de alcaparras
1/2 limón, zume
Alioli

1. Machuca lixeiramente o sal, o azucre, o tomiño, as sementes de fiúncho, o allo e a reladura de pel de limón nun morteiro.

2. Engade as alcaparras, os ravos, as follas de loureiro e as olivas á mestura. Coloca o filete de salmón nunha bandexa para forno e verte a mestura sobre el. Mestúrao con coidado. Déixao repousar durante 20 minutos a temperatura ambiente.

3. Prequece o forno a 120 °C, coa función de aire forzado, e quenta o aceite de oliva a 40 °C.

4. Verte o aceite sobre o salmón e remóveo con coidado de forma que todas as pezas queden cubertas.

5. Enforna na bandexa central do forno durante uns 10 minutos ata que o salmón case se desfaga ao picar un garfo nel. Retira a bandexa e deixa que o peixe repouse co aceite.

6. Corta a raíz do fiúncho e córtao moi fino.

7. Quita as follas das coles de Bruxelas e corta o centro en tiras finas.

8. Mestura as follas verdes con alcaparras, zume e reladura de limón, sal e pementa. Pono nun cunco bonito. Retira o aceite do salmón e sírveo todo xunto con alioli.


Detalle dun tartar de salmón afumado con medias cebolas chamuscadas.

Tartar de salmón afumado en frío con cebolas chamuscadas

As cebolas fan a función de base comestible para o tartar. Utiliza cebolas brancas se prefires un sabor a cebola máis suave. Ideal para ofrecer aperitivos mentres preparas a cea.

Para 4 persoas Tempo: 30 min

300 g de lombo de salmón
afumado en frío SJÖRAPPORT
3-4 cebolas pequenas, prateadas ou amarelas
1 cullerada de vinagre de viño
3 culleradas de manteiga
1 presada de melisa ou outra herba alternativa
Sal e pementa
Carochos quentados en manteiga
Sementes de mostaza en vinagre (ver abaixo)

Sementes de mostaza en vinagre
4 culleradas de sementes de mostaza
150 de ml de auga
50 ml de vinagre de alcohol
100 ml de azucre

1. Corta o salmón en cubos duns 3-4 mm. Envólveo en plástico e reserva.

2. Sen pelalas, corta as cebolas pola metade ao longo dende a raíz ata a parte superior. Pinta cun pincel as superficies cortadas con aceite. Doura as cebolas, coas superficies cortadas cara a abaixo, nunha tixola.

3. Coloca as cebolas nun prato apto para o seu uso no forno, coas superficies cortadas cara a abaixo. Engade vinagre e manteiga en pequenas boliñas.

4. Enforna durante aprox. 10 minutos (175 °C) ata que estean brandas.

5. Pela as cebolas, quita a raíz e a punta superior. Separa con coidado as capas da cebola. Coloca as capas máis grandes da cebola nunha fonte.

6. Mestura os cubos de salmón con melisa cortada, e engade sal e pementa ao gusto. Coloca o tartar de salmón nas capas de cebola, bota os carochos e as sementes de mostaza en vinagre por enriba.

Sementes de mostaza en vinagre

1. Pon a ferver todos os ingredientes e remove ata que se disolva o azucre.

2. Pásao todo a un tarro e deixa que arrefríe. Pon o tarro no frigorífico e as sementes conservaranse durante varias semanas.


Gambas revoltas con chile e allo aderezado con perexil, servidas nunha tixola de ferro fundido, vistas dende arriba.

Gambas revoltas con chile e allo

Un prato fantástico para unha excursión, xa que se pode preparar nunha fogueira. Lembra que non debes fritir as gambas demasiado tempo ou quedarán un pouco duras.
 
Para 4 persoas Tempo de preparación: 30 min
 
500 g de gambas sen pelar SJÖRAPPORT
2 chiles vermellos
2-3 dentes de allo
100-200 ml de aceite
sal e pementa negra
50 ml de follas de perexil picadas
o zume de 1⁄2 limón
pan torrado ou á grella para servir
1. Desconxela e pela as gambas. Corta o chile e o allo en anacos moi finos.
2. Quenta bastante aceite nunha tixola. Frite as gambas, o chile e o allo a lume forte durante aproximadamente un minuto ata que comecen a dourarse, e engade sal e pementa ao gusto.
3. Retira a tixola do lume e engade o perexil. Espreme o zume de limón e sirve con pan torrado ou á grella.

Ensalada de espárragos con perlas de algas mariñas e crema fresca servida nunha táboa de cortar de madeira, vista dende arriba.

Ensalada de espárragos con perlas de algas.

Os grans de avea / trigo fan que esta ensalada sexa un pouco máis importante, pero podes deixalos fóra se queres. Usa a túa propia mestura de especias favorita.

Para 4 persoas Tempo 30 min.

2 presas (250 g cada unha) de espárragos verdes
sal
1 presa de ceboliñas
Aceite para fritir
100 mg de grans, por ex. bagas de trigo ou grans de avena
1 cullerada de vinagre
2-3 culleradas de aceite de oliva
Un chisco da mestura de especias IKEA PS con mazá e fiúncho
50-100 ml de crema fresca
aprox. ½ tarro (algo máis de 40 g) de perlas de algas negras SJÖRAPPORT

1. Corta e ferve os espárragos en auga lixeiramente salgada durante aproximadamente un minuto; aínda deben quedar un pouco crocantes. Arrefría en auga con xeo para deter a cocción.

2. Corta as ceboliñas e fríteas en aceite nunha tixola ata que adquiran unha lixeira cor.

3. Cociña os grans segundo as instrucións no paquete. Escorre a auga e fríteos ata que estean crocantes nun pouco de aceite nunha tixola.

4. Coloca os espárragos e as ceboliñas nun prato grande. Mestura o vinagre, o aceite e as especias nunha vinagreta e aspérxeo. Bota os grans por enriba. Engade unhas culleradas de crema fresca e perlas de algas.


Un prato con tomate aderezado con perexil e servido en cuncos pequenos de cerámica branca sobre unha bandexa, visto dende arriba.

Ostras con tomate

As cebolas fan a función de base comestible para o tartar. Utiliza cebolas brancas se prefires un sabor a cebola máis suave. Ideal para ofrecer aperitivos mentres preparas a cea.

Para 4 persoas Tempo: 30 min

Aceite de herbas (con esta receita conséguese bastante cantidade; máis abaixo tes algúns consellos sobre como empregar o resto)
150 ml de aceite de oliva
50 ml de aneto picado
50 ml de perexil picado
½ culleradiña de sal
6–8 tomates (só as sementes)
1 culleradiña de sal
1 culleradiña de vinagre de sidra de mazá
2 culleradas de auga
85 g de perlas de algas negras SJÖRAPPORT
Aneto e coroa de aneto para servir

Aceite de herbas: Mestura ben todos os ingredientes e colócaos nun tarro. Só precisarás un par de culleradas para este prato. Emprega o resto para engadir a calquera aliño de ensalada ou prato de pasta, ou como toque final con clase para o puré de patacas.

1. Corta os tomates en metades ou cuartos (dependendo do seu tamaño) e extrae as sementes con coidado. Trata de mantelas unidas o máximo posible. (Nesta receita só se empregan as sementes; garda o resto do tomate para unha salsa para pasta ou similar).

2. Reparte as sementes de modo uniforme entre 8 vasos ou cuncos pequenos.

3. Mestura sal, vinagre, auga e perlas de algas. Engade a mestura nos vasos coas sementes de tomate.

4. Remata o prato con aneto (picado) e coroa de aneto, e sirve cunha culler. Espreme o zume de limón e sirve con pan torrado ou á grella.


Ensalada con salmón picante e aguacate servido nun cunco de cerámica branca, visto dende arriba.

Ensalada con salmón picante e aguacate

Unha ensalada verde con feixóns verdes, sabores de lima e un aderezo de ravo picante.

Para 4 persoas Tempo: 25 min

500 g de filetes de salmón SJÖRAPPORT
190 g de salsa de rabo picante SÅS PEPPARROT
150 g de xudías verdes
1 culleradiña de pemento en especia
1/2 culleradiña de chile en po
2 aguacates
70 g de ensalada verde mixta 1 lima, zume
1/2 dl de aceite de oliva virxe extra
Sal e pementa negra

1. Pon a ferver 1 litro de auga cun pouco de sal. Ferve os feixóns verdes durante 2 minutos, retira a auga e pásaos por auga fría para que arrefríen.

2. Pon ao lume unha tixola ou unha grella ata que estean moi quentes. Sazona o salmón con sal, pementa negra, pemento en especia e chile en po. Asa o salmón na grella volta e volta durante aproximadamente 30 segundos. Colócao nunha bandexa para que arrefríe e reserva a un lado.

3. Mestura os feixóns coas follas de ensalada nun cunco. Engade aceite de oliva, zume de lima, sal e pementa negra. Reparte a ensalada en catro pratos.

4. Abre os aguacates pola metade, quita o óso e córtaos en toros. Colócaos por enriba da ensalada.

5. Corta o salmón en tiras finas e colócao sobre a ensalada. Bota un pouco de salsa por enriba e sírvea inmediatamente.


Verduras con personalidade

Albóndegas vexetais con raíz de apio enfornada e gremolata, vistas dende arriba.

Albóndegas vexetais con raíz de apio e gremolata

Unha cea sinxela que case se fai soa!

Para 4 persoas Tempo: 1,5 min

40 unidades (640 g) de albóndegas vexetais ALLEMANSRÄTTEN
2 raíces pequenas de apio, ben lavadas
2 culleradas + 100 ml de aceite de oliva virxe extra
100 ml de perexil, cortado en anacos grandes
1 limón, zume e casca relada
1 dente de allo, relado
2 culleradas de mostaza de Dijon
Sal e pementa negra

1. Quenta o forno 185 °C.

2. Coloca o apio nunha bandexa para enfornar e engade 2 culleradas de aceite de oliva, sal e pementa. Enforna durante aproximadamente 40–60 minutos ata que estean totalmente cociñados e a pel estea dourada.

3. Mestura o perexil, o allo e a reladura de limón nun cunco cos dedos para facer a gremolata.

4. Bate a mostaza de Dijon con zume de limón e o resto do aceite de oliva para preparar unha vinagreta. Sazónao con sal e pementa.

5. Frite as albóndegas vexetarianas como se indica no envase.

6. Corta o apio en anacos máis pequenos. Verte algo de vinagreta sobre un prato grande e coloca o apio e as albóndegas vexetais enriba. Remata o prato con algo de gremolata e unhas gotas de aceite de oliva.


Ensalada estival con albóndegas vexetais servida nun prato de madeira, vista dende arriba.

Ensalada estival con albóndegas vexetarianas

Unha boa ensalada é un antollo en verán.

Para 4 persoas Tempo: 25 min

40 unidades (640 g) de albóndegas vexetais ALLEMANSRÄTTEN
4 remolachas Chioggia (ou calquera outro tipo de remolacha)
12 espárragos verdes, cortados
100 ml de aceite de oliva virxe extra
2 aguacates
1 dente de allo, relado
1 limón, zume
4 cenorias (de cores diferentes se for posible)
12 rabos
100 g de chícharos verdes doces, divididos pola metade ao longo
70 g de follas verdes (por exemplo acelgas, espinacas, ollos de leituga) lavadas
50 ml de follas de menta en anacos grandes
Sal e pementa negra

1. Pon a ferver 2 remolachas en auga ata que estean brandas. Déixaas arrefriar, pélaas e córtaas en toros finos.

2. Pon ao lume unha grella ou unha tixola normal ata que estea moi quente. Verte unha cullerada de aceite de oliva sobre os espárragos e fainos á grella ata que teñan cor. Colócaos nun prato, sazona con sal, e reserva.

3. Mestura os aguacates cun batedor. Mestura co allo, o zume de limón e o sal nun cunco, e reserva.

4. Pela o resto das remolachas, as cenorias e lava os ravos. Córtao todo moi fino. Mestura coas remolachas cocidas, os espárragos, os chícharos doces, a menta, o aceite de oliva e o zume de limón. Sírveo todo nun prato.

5. Frite as albóndegas vexetarianas como se indica no envase e párteas sobre a ensalada. Serve o prato coa salsa de aguacate nun lado.


Crema de remolachas asadas e albóndegas vexetais sobre pan naan aderezado con iogur e ceboliño picado, servido sobre unha táboa de madeira, visto todo dende arriba.

Crema de remolacha asada, albóndegas vexetais e pan naan.

Unha cea sinxela que case se fai soa!

Para 4-6 persoas Tempo: 2 horas

20 unidades (320 g) de albóndegas vexetais ALLEMANSRÄTTEN
8 remolachas, lavadas
Sal mariño groso
1 ración de pan naan
1 cullerada de vinagre de Xerez (ou vinagre de viño tinto)
2 culleradas de aceite de oliva virxe extra
200 ml de iogur turco para servir de acompañamento
2 culleradas de ceboliño, ben picado

1. Prequece o forno a 165 °C.

2. Coloca as remolachas nunha bandexa para forno e cúbreas con sal mariño. Asegúrate de que as remolachas queden totalmente cubertas.

3. Enforna durante aprox. 1 hora ata que queden totalmente tenras. Déixaas arrefriar.

4. Prepara os pans naan.

5. Pela as remolachas e córtaas en anacos pequenos; se podes, usa un robot de cociña e utiliza a función de mesturado.

6. Aliña cun pouco de vinagre de Xerez e aceite de oliva.

7. Frite as albóndegas vexetarianas como se indica no envase.

8. Pon algo de crema de remolacha, unha ou dúas albóndegas vexetais fritas e unha cullerada de iogur enriba de cada pan. Remata o prato co ceboliño.


Pan naan servido nun prato negro, visto dende arriba.

Pan naan

A crema de remolacha doce asada ao sal é o mellor aliado do pan naan.

Para 12 persoas Tempo: 40 min

250 g de fariña de trigo
2 culleradiñas de azucre
1/2 cullerada de sal
1/2 culleradiña de fermento químico
125 ml de auga
2 culleradas de aceite de oliva virxe extra

1. Mestura todos os ingredientes secos nun cunco.

2. Engade a auga e o aceite de oliva. Remove cunha culler de madeira ata que todo quede ben mesturado. Verte todo sobre o mesado e amásao á man ata que quede liso.

3. Volve colocalo no cunco. Cúbreo con filme transparente e déixao repousar durante 15 minutos.

4. Volve colocar a masa no mesado e córtaa en cadrados pequenos de 5 x 5 cm. Fai boliñas e enfaríñaas lixeiramente. Cúbreas con filme transparente e déixaas repousar durante 10 minutos.

5. Quenta unha tixola a lume medio/forte ata que solte un pouco de fume.

6. Esmaga as bólas deixándoas o máis finas que poidas. Pon algo de fariña por debaixo para que non se peguen. Pásaas unha a unha pola tixola entre 30 segundos e 1 minuto por cada lado. Ten coidado porque é doado que se queimen. O pan naan estará listo cando teña unha consistencia lixeira e unha cor dourada. Garda o pan debaixo dun pano para mantelo brando.


Albóndegas vexetais con coles de Bruxelas e col vermella en vinagre servidas nun prato de madeira, vistas dende arriba.

Albóndegas vexetais con coles de Bruxelas e col vermella en vinagre

Un prato vexetal fantástico, moi ben equilibrado cos sabores da col e as herbas.

Para 4 persoas Tempo: 45 min

40 unidades (640 g) de albóndegas vexetais ALLEMANSRÄTTEN
300 g de patacas pequenas
2+2 culleradas de aceite de oliva virxe extra
1 ración de col vermella en vinagre para servir de acompañamento
300 g de coles de Bruxelas

Crema fresca ás finas herbas
100 ml de crema fresca
1 cullerada de ceboliño, picado
1 cullerada de perexil, picado
1/2 limón, zume e casca relada
Sal e pementa negra

1. Prequece o forno a 200 °C. Coloca as patacas nunha bandexa para enfornar e engade 2 culleradas de aceite de oliva e sal. Enforna durante 25 minutos ata que estean perfectamente tenras e douradas.

2. Prepara a col vermella en vinagre.

3. Limpa as coles de Bruxelas e córtaas pola metade ata a raíz.

4. Frite as albóndegas vexetais coas coles de Bruxelas en 2 culleradas de aceite de oliva ata que queden douradas.

5. Mestura a nata líquida co ceboliño picado, o perexil e o zume/reladura de limón. Sazónao con sal e pementa. Mestúrao todo.

6. Coloca todo nun prato e remátao coa col vermella en vinagre.


Tarros de vidro nun estante cheos con col en vinagre e pementos vermellos.

Col vermella en vinagre

Ración para 1 tarro
Tempo: 30 minutos + unha semana para macerar

200 ml de vinagre
200 ml de auga
50 ml de azucre
1+1 culleradiña de sal
2 follas de loureiro
1 culleradiña de sementes de coandro
1/2 culleradiña de copos de chile
400 g de col vermella

1. Pon o vinagre, a auga, o azucre, 1 culleradiña de sal e as especias a ferver nunha pota. Retíraa do lume e déixaa macerar 30 minutos.

2. Corta a col moi fina cunha mandolina ou cun coitelo e colócaa nun cunco. Mestúraa con 1 cullerada de sal e déixaa repousar durante 20 minutos para que abrande. Desbota o líquido da col e colócaa nun tarro de conservas en vinagre.

3. Coa o vinagre líquido e vérteo sobre a col. Pon unha tapa e déixaa macerar no frigorífico durante polo menos unha semana antes de servila.


Ensalada de chicoria e noces con albóndegas vexetais servida nun prato de cor gris escuro, vista dende arriba.

Ensalada temperada de chicoria e noces con albóndegas vexetais

Pasar as chicorias pola grella potencia os sabores da ensalada, que se complementa perfectamente coa salsa de noces.

Para 4 persoas Tempo: 50 min

40 unidades (640 g) de albóndegas vexetais ALLEMANSRÄTTEN
1 ración de salsa de noces (véxase a receita anexa)
1 chicoria grande ou 2 pequenas
1 + 2 culleradas de aceite de oliva virxe extra
1 limón, zume
Sal e pementa negra

1. Prepara a salsa de noces.

2. Corta as chicorias en cuartos ou metades, dependendo do seu tamaño. Cúbreas con 1 cullerada de aceite de oliva. Fainas á grella ou fríteas a lume forte ata que case estean queimadas e teñan unha cor dourada.

3. Frite as albóndegas vexetarianas como se indica no envase.

4. Corta as follas da ensalada en folerpas e colócaas nunha fonte grande. Parte e coloca as albóndegas vexetais enriba, e aliña cun pouco de salsa de noces. Remata cun chorriño de aceite de oliva, zume de limón, sal e pementa para darlle o toque final.


Detalle das noces enteiras e partidas.

Salsa de noces

Unha deliciosa salsa que se pode servir quente ou fría. Pódese usar como salsa de acompañamento xunto con verduras tipo aperitivo.

Para 4 persoas Tempo: 50 min

800 ml de leite
1 cebola amarela, cortada
3 dentes de allo cortados
2 follas de loureiro
50 g de manteiga
1/2 noz moscada relada
1/2 culleradiña de sal
125 g de noces
2 culleradas de auga
1/2 culleradiña de sal
200 g de pan duro (preferiblemente, de masa nai) cortado en anacos grandes
Pementa negra
1 cullerada de vinagre de Xerez (ou vinagre de viño tinto)

1. Pon a ferver o leite coa cebola, o allo, as follas de loureiro, a manteiga, a noz moscada relada e o sal. Baixa o lume e segue cociñándoo a lume lento durante 20–30 minutos.

2. Prequece o forno a 175 °C. Pon as noces nunha bandexa de forno xunto á auga e o sal. Enforna na bandexa central do forno durante 10 minutos.

3. Retira e desbota as follas de loureiro. Engade o pan e 2/3 das noces ao leite. Deixa que o pan absorba o líquido. Engade o vinagre e a pementa negra. Mestúrao todo cun mesturador ata que quede fino.

4. Verte a salsa quente nun cunco, pica o resto das noces e esparéxeas por enriba.


Albóndegas vexetais en salsa de tomate con ovos escalfados, servidas nunha tixola de ferro fundido, vistas dende arriba.

Ovos rancheiros con albóndegas vexetais

Este é un prato de «revolto» perfecto, e o sabor do pan de centeo mollado na salsa non se pode nin explicar.

Para 4 persoas Tempo: 35 min

40 unidades (640 g) de albóndegas vexetais ALLEMANSRÄTTEN
2 cebolas picadas moi finas
2 pementos vermellos cortados finos
2 dentes de allo ben picados
2 culleradas de aceite de oliva virxe extra
1 culleradiña de pemento
1/2 culleradiña de pementa de caiena
1 culleradiña de azucre
1 culleradiña de comino
1 lata de tomates pelados
1 lima, zume
Sal e pementa
4 ovos

1. Frite as cebolas, o pemento vermello e o allo nunha tixola con aceite de oliva ata que queden douradas e tenras.

2. Engade os condimentos e os tomates. Machuca os tomates cunha culler en anacos pequenos. Cocíñao todo a lume lento durante 5-10 minutos e sazónao con sal e pementa.

3. Frite as albóndegas vexetarianas como se indica no envase.

4. Baixa o lume ao mínimo para a salsa de tomate e engade as albóndegas vexetais. Remóveo todo e fai 4 "buratos" na salsa. Rompe e coloca un ovo en cada burato. Coloca unha tapa sobre a tixola e cocíñao todo durante outros 5-10 minutos ata que as claras dos ovos estean calladas.

5. Empoa o coandro e o ceboliño por enriba e serve con pan de centeo.


Comidas saborosas nun minuto

Burrito de albóndega vexetal con aguacate servido en papel de forno e suxeitos cun cordel.

Roliño de albóndegas vexetais con aguacate

Un roliño suave e tenro con aguacate, hummus e albóndegas vexetais.

Para 4 persoas Tempo: 30 min

40 unidades (640 g) de albóndegas vexetais ALLEMANSRÄTTEN
4 culleradas de humus
4 rebandas de pan fino suave BRÖD TUNNBRÖD
2 aguacates
4 ceboliñas cortadas finas
50 ml de follas de menta en anacos grandes
1 cullerada de aceite de oliva virxe extra
1/2 limón, zume
Sal e pementa

1. Coloca as rebandas de pan fino suave sobre o mesado. Colle medio aguacate e esténdeo esmagándoo cun garfo. Xunto ao aguacate, estende algo de hummus.

2. Mestura as ceboliñas, a menta, o aceite de oliva, o sal e a pementa. Reparte a mestura sobre o aguacate e o hummus.

3. Enforna ou frite as albóndegas vexetais como se indica no envase. Déixaas sobre un anaco de papel de cociña para quitarlles a graxa sobrante, párteas pola metade e ponas enriba da mestura anterior.

4. Enrólaos ben en papel de forno.


Roliños con salmón mariñado e salsa de mostaza, servidos sobre unha bandexa de mármore decorada con follas de ensalada e herbas recollidas, vistos dende arriba.

Minirroliños con salmón mariñado e salsa de mostaza

Unha comida rápida e doada de preparar, perfecta como aperitivo de benvida, para un pícnic ou un bufete.

Para 4 persoas Tempo: 15 min

2 rebandas de pan fino suave BRÖD TUNNBRÖD
200 g de salmón afumado SJÖRAPPORT
50 g de manteiga a temperatura ambiente
200 g de salsa SÅS SENAP & DILL para salmón
35 g de mestura para ensaladas
50 ml de herbas acabadas de apañar para decorar

1. Unta o pan con manteiga e logo engade os liscos de salmón por enriba.

2. Cubre o salmón con salsa e ensalada. Enrola e corta en pezas de 2 cm. Colócaas nunha bandexa bonita co lado cortado mirando cara a arriba.

3. Decora con follas de ensalada e as herbas acabadas de coller. Bota un pouco de salsa por enriba e serve.


Gofres con gambas acompañadas con espárragos, vistos dende arriba.

Gofres con gambas

Confía en nós, cando combines os teus gofres cun pouco de salmón sedoso e salgado, xa non haberá volta atrás.

Para 4 persoas Tempo: 25 min

240 g de gofres VÅFFLOR
500 g de gambas sen pelar SJÖRAPPORT
200 ml de crema fresca
1⁄2 cebola vermella, cortada fina
1 presa de espárragos
100 ml de azucre

1. Desconxela os gofres e fríteos nunha tixola con manteiga ata que estean dourados. Sazona cun pouco de sal.

2. Mestura a nata líquida coa cebola cortada nun cunco pequeno.

3. Corta os espárragos en anacos de 2,5 cm en diagonal. Saltea durante uns 3 minutos ata que quede crocante por fóra e tenro por dentro, removendo con frecuencia.

4. Verte sobre o centro dos gofres a mestura de nata líquida e cebola, cunha capa de 3 ou 4 gambas peladas, e remata cos espárragos.

Gofres con diferentes ingredientes, como salmón mariñado, arandos vermellos secos cunha mestura de agróns, porros e cenorias, e sementes de granada mesturadas con requeixo.

Festa de gofres con diferentes ingredientes

Deliciosos gofres con ingredientes frescos e saudables, como requeixo, arandos vermellos, verduras e salmón mariñado.

Para 4 persoas Tempo: 20 min

Gofres á xardineira
240 g de gofres VÅFFLOR
300 g de requeixo
1 cenoria
10 cm de porro
1 bandexa de agróns
50 g de arandos secos

Pela e rela a cenoria. Corta o porro moi fino. Corta os agróns e mestúraos nun cunco coa cenoria e o porro. Prepara os gofres seguindo as instrucións que se mostran no envase. Engade os arandos e mestura todo cun garfo. Pon unha cullerada de requeixo enriba de cada gofre. Engade a ensalada de cenoria e porro por enriba.

Gofres á mariñeira
240 g de gofres VÅFFLOR
200 g de salmón afumado SJÖRAPPORT
2 culleradas de mostaza granulada SENAP GROV
200 ml de nata líquida
2 talos de aneto

Mestura a mostaza e a nata líquida nun cunco. Prepara os gofres seguindo as instrucións que se mostran no envase. Pon unha rebanda de salmón mariñado en cada gofre. Engade unha cullerada da mestura de nata líquida e mostaza e decora cunha ramiña de aneto.

Gofres á leñadora
240 g de gofres VÅFFLOR
300 g de requeixo
80 g de arandos vermellos frescos (ou sementes de granada)
2 talos de menta fresca

Prepara os gofres seguindo as instrucións que se mostran no envase. Pon un pouco de requeixo no centro de cada gofre e engade os arandos vermellos. Decora cunhas follas de menta e sirve.