Cociña con IKEA: ensalada de gambas con chutney de laranxa

Se hai algo que nos encanta é unha receita sinxela coa que sorprender a todos os nosos convidados ou, sinxelamente, dármonos un capricho gastronómico (que tamén o merecemos!). Por iso, desta vez traémosvos un aperitivo fácil e rápido co que deleitar o noso padal e sen apenas esforzo. Soa xenial, verdade?

Hoxe para comer en #CocinaConIKEA, unha ensalada de gambas deliciosa e diferente servida sobre pan e con chutney de laranxa. Bo proveito!

Coñece o noso chef

Acórdaste de Julio Fernández? Foi o noso chef elixido para elaborar unha deliciosa receita de albóndegas de salmón con mostaza doce e aneto. E como nos gustou tanto a súa boa man para a cociña, convidámolo para deleitarnos novamente cos seus pratos. 

Por se queres facer un pouco de memoria, Julio traballa en IKEA FOOD desde hai seis anos e na actualidade é Kitchen Specialist do restaurante da tenda de IKEA Goya en Madrid. Desde pequeno, Julio foi un apaixonado da cociña e a súa sede de aprendizaxe é insaciable. De feito, continúa coa súa formación cursando estudos de xefe de cociña na Escuela de Hostelería y Turismo (ESAH).

Ademais, ten un blog persoal de receitas onde podes descubrir moitas máis ideas para as túas comidas e ceas. Un blog que el mesmo describe como "un espazo onde atoparás unha cociña sinxela, para todos, pero cun toque canalla". Bótalle un ollo: www.laollacanalla.com

Sabías que...?

A receita de hoxe está protagonizada, como non, por unhas riquísimas gambas peladas. En IKEA, seguindo co noso compromiso, garantimos que este produto cumpre o estándar internacional do MSC sobre sostibilidade.

Procedentes de pesqueiras sostibles do Atlántico nordés e noroeste, as nosas gambas só levan ingredientes naturais (non levan nin aditivos nin conservantes). E, ao conxelarse xusto despois de seren capturadas, conservan todo o seu sabor, calidade e valor nutricional. Por iso están tan boas! É un produto máis respectuoso co medio ambiente, a un prezo moi alcanzable e comodísimo de utilizar nos teus pratos.

Dito isto, vamos coa nosa receita. Ao choio!

Ingredientes para 4 comensais

• 1 bolsa de gambas peladas conxeladas SJÖRAPPORT (que hai que desconxelar previamente)
• 1 bolsa de preparado para pan ácimo KNÅDA
• 10 g de curry
• 220 g de marmelada de laranxa e flor de sabugueiro  
• 50 g de salsa de ravo picante
• 75 g de iogur grego
• 30ml de aceite de oliva
• 5 g de xenxibre
• 70 g de cebola vermella
• 30 ml de vinagre de mazá
• 5 grans de pementa negra
• 5 grans de coandro
• Coandro (ao gusto)

Fáltache algún ingrediente? Non te preocupes, podes atopalos na nosa tenda sueca.

Preparación 

Empezaremos pola base da ensalada que, como anticipamos, será o noso pan ácimo. Para iso, seguiremos as instrucións que veñen no paquete do noso preparado de pan ácimo KNÅDA.

Mira que sinxelo é preparalo: 

1. Dentro do mesmo paquete de preparado, engadimos 50 ml de aceite de oliva. 
2. A continuación, coa axuda dunha xerra ou botella de cristal, verte 200 ml de auga.
3. Selamos o paquete co peche que vén por defecto. 
4. Agora, mantén a bolsa recta e amasa a mestura ata obteres unha pasta lisa (durante uns 5 min aproximadamente). 
5. Despois, saca a pasta do paquete e divídea en anacos redondos, tipo boliñas. Se o vas servir como aperitivo, procura que non sexan anacos moi grandes.
6. Pon unha tixola a quecer.
7. Antes de cociñar cada porción, dámoslle un pouco de forma esmagando coa palma da man a masa de xeito que quede plana. Consello: Podes axudarte dunha táboa de cortar de madeira para poñelas enriba e ir aplanándoas coas dúas mans. 
8. Cocíñaas unha a unha na tixola ata que teñan o punto torradiño que desexes (cuns 3 min será dabondo). Podes ir dándolles a volta cunhas pinzas de cociña ou unha espátula. 
9. Cando as teñas todas, saca cada filloa e colócaas nun prato. Despois, cúbreas cun trapo ou pano de cociña húmido para que se manteñan esponxosas. 

Preparación da salsa de ravo

Agora tócalle á salsa! Para faceres a salsa de ravo picante abonda con seguires estes pasos: 

• Nun cunco de cociña, mesturamos a salsa de ravo que temos no bote co iogur. 
• Coa axuda dunha simple culler, remexemos todo ben para mesturar ambos ingredientes. 
• Unha vez integrados, gardamos a mestura nun biberón de cociña e metémolo na neveira ata que teñamos que servila na ensalada. 

Preparación do chutney de laranxa

Seguimos con esta deliciosa ensalada de gambas peladas. Chega a vez do chutney de laranxa, que prepararemos coa marmelada de laranxa e flor de sabugueiro. 

• Empezamos dourando as especias (pementa e coandro) a lume medio nunha tixola. 
• Cortamos e picamos a cebola morada.
• Pelamos o xenxibre e picámolo. Se che resulta máis doado, tamén podes relalo.
• Cando as especias estean douradiñas, engadimos o aceite de oliva, a cebola e o xenxibre. 
• Rustrimos a lume medio ata que a cebola estea case transparente. 
• Agora engadimos a marmelada de laranxa e o vinagre de mazá.
• Cociñamos todo ata que colla consistencia. 

Empratado

Rematamos este prato montando todas as partes que fomos elaborando. Vamos empratar: 

1. Colocamos unha das porcións de pan como base. 
2. Botamos unha capa da nosa chutney de laranxa.
3. Engadimos unha presada de gambas (lembra desconxelalas previamente).
4. Engadimos a salsa de ravo e iogur por riba. 
5. Rematamos cun pouquiño de coandro picado. 
6. Repetimos o proceso con todas as demais racións.
7. Listo!

Que che pareceu? Prepara os mellores pratos con estas receitas sinxelas para cociñar sen complicacións e co resultado dun auténtico profesional. Ah! Non esquezas compartir as túas receitas connosco a través de redes sociais co hashtag #CocinaConIKEA. Estaremos encantados de ver as túas creacións!

Non perdas todas estas deliciosas receitas.