Consellos de seguridade para o descanso do teu bebé
Cada familia decide cal é a mellor forma de levalo a cabo: leito compartido, berce, cuarto separado etc. Aínda que unha cousa é o que se decide e outra o que o bebé vos deixa facer cada día. En calquera caso, o descanso é un elemento vital para a saúde e o desenvolvemento dun bebé. Non te preocupes, aquí tes algunhas consideracións fundamentais de seguridade que poden axudarte a afrontar mellor un dos maiores retos dun pai ou dunha nai.
Un bo berce é a base para un descanso tranquilo
No primeiro ano de vida, a maioría dos bebés durmirán durante 12 ou 15 horas ao día. Por iso, a forma de preparar o berce é vital para a túa tranquilidade, xa que é onde o bebé pasa unha gran parte do tempo.
Na práctica, no berce só é preciso ter un colchón firme e unha saba axustable. Para que o bebé non pase frío, pero tampouco calor, xoga con distintos tipos de roupa de durmir lixeira, axustada á temperatura da estancia.
O berce dun bebé non debe ter nada máis ca un colchón firme e unha saba axustable.
A seguridade do bebé no berce e ao seu redor
Os berces IKEA están deseñados, fabricados e probados a fin de que sexan seguros para o teu bebé. Pero é importante considerar tamén como preparalos e saber que outros produtos para o fogar poden estar preto no cuarto.
Algúns consellos para preparar o berce
- Utiliza un colchón para bebés firme. O berce e o colchón deben ter as mesmas dimensións para que o bebé non quede atrapado nun dos laterais. Todos os nosos berces e colchóns teñen as mesmas medidas; así tes algo menos do que preocuparte.
- As sabas axustables deben ter as mesmas dimensións que o colchón, xa que se están ben axustadas non se soltarán no berce do bebé.
- Utiliza un protector de colchón LEN fabricado con materiais que transpiren. Os que están feitos de materiais que non transpiran son para nenos de máis de 3 anos.
- Os peluches e outros bonecos deben estar fóra do berce para que o bebé poida durmir e moverse con soltura, sen risco de que lle caian enriba.
- Mantén a base do berce na súa posición máis baixa unha vez que o bebé se poida sentar só, para evitar que gabee polo lateral.
- Cando o neno ou a nena sexa quen de subir e baixar só do berce, é mellor retirar o panel lateral para evitar que gabee por el e caia. Porén, tamén é un bo momento para pensar en trocar o berce por unha cama infantil.
Algúns consellos de seguridade arredor do berce
- Os nosos estores xa teñen os tiradores ocultos, mais procura manter tamén as cortinas e os cables das lámpadas fóra do alcance do teu bebé para evitar que se enrede.
- Os doseis, os móbiles para bebés e outros téxtiles son preciosos e aos bebés encántanlles. Iso si, evita que estes téxtiles longos colguen sobre o berce.
- É mellor colocar o berce lonxe dos radiadores, da tubaxe quente e mesmo da luz directa do sol, xa que a pel dun bebé é moito máis fina que a dun adulto.
- Mantén os mobles a unha distancia segura do berce. Se o teu bebé é inquedo, podería usalos para gabear polo berce, co risco de caída que iso comporta.
- Non fixes nunca ganchos, tiradores ou obxectos semellantes ao berce, xa que o bebé podería quedar atrapado cando se mova dentro del.
Un colchón seguro debe axustarse perfectamente ao berce, sen deixar ocos nos que o bebé poida quedar atascado.
