Restaurante Barkhult

A granxa familiar xa atende pedidos

Martin Roman leva moitos anos traballando no sector da restauración e xa é un rostro coñecido entre os comensais de Älmhult. Agora, quere dar un paso máis coa apertura da súa casa ao público.

"Os veciños de Älmhult teñen unha forma de pensar moi especial. A súa mentalidade é emprendedora e resolutiva, e sempre atopan unha maneira de saír adiante, con enxeño e traballo duro".

Martin sabe ben do que fala. Ao igual que IKEA, Martin naceu en Älmhult, concretamente en Barkhult, unha granxa próxima. Tras varios anos dirixindo restaurantes en Älmhult e noutras cidades, Martin xa está afeito a emprender novas aventuras, coma a de transformar a súa casa nunha parte do negocio. 

Duns poucos eventos a unha actividade sostible

"A miña familia leva moitas xeracións traballando as terras de Barkhult, pero na actualidade apenas nos dedicamos á labranza. Hai uns anos tivemos a idea de usala como complemento dos restaurantes, para acoller xuntanzas que non fosen necesariamente familiares. Fixemos unhas cantas probas e saíron ben. A partir de aí, Barkhult converteuse, pouco a pouco, no centro da nosa actividade". Ao principio só acollían eventos como algunha que outra voda ou conferencia, pero, co tempo, as actividades comezaron a ser máis habituais. Aínda que os eventos seguen a ser unha parte importante do negocio, o forno xigante para pizzas é agora o protagonista. "O noso prato principal é a pizza feita ao estilo napolitano. Tamén, dependendo da tempada, facemos o típico smorgasbord sueco e algunha churrascada. Os domingos, por suposto, preparamos un delicioso brunch".

O vello e o novo mestúranse cun estilo rústico

Ao ter o seu negocio en Älmhult, era moi probable que IKEA lles botase unha man, dun xeito ou doutro. "Os/as colaboradores/as de IKEA son clientes habituais desde hai moito tempo. O natural era pedirlles consello. Queríamos renovar Barkhult para atender a unha maior clientela, pero sen perder a esencia da nosa corte de madeira. Falamos con varios deseñadores de interiores, puxemos varias ideas en común, e o resultado mestura o mellor dos dous mundos".