Visita a un fogar: converte os obxectos cotiáns en expositores

1. Crea unha colaxe de fotos familiares Aproveita ao máximo unha parede complicada, coma a dunhas escaleiras. Aquí utilizáronse tres marcos de distintos tamaños para conformar un conxunto que ocupa cada centímetro con recordos familiares.

2. Alimenta a vista Nesta cociña aberta, gárdase unha colección de libros de cociña xunto a unha vitrina que fai as veces de despensa (un armario IKEA antigo), o que permite ver doadamente os ingredientes da próxima receita.

3. Deixa ver os utensilios de cociña Colga as táboas de cortar para aforrar espazo e exhibilas ao mesmo tempo.

4. A diversión está nos detalles Engade toques orixinais en cada estancia. Si, tamén no recibidor. Ganchos superprácticos para que teñas organizados e á man bolsos, chaquetas e lentes de sol.

5. Atrévete coa almacenaxe Personaliza as solucións de almacenaxe aberta. Decora cada alcoba cunha temática e crea unha minigalería ao teu gusto en cada unha.

6. Mesas de noite moi sinxelas Elixe unha composición que sexa práctica e bonita. Dálle altura cunha morea de libros e unha lámpada que che permita cambiar a inclinación, ideal para ler polas noites.

7. Selecciona ben a túa colección Para que a túa galería mural sexa máis interesante, colga obxectos desemparellados e agrúpaos por forma e cor. As ramas e a madeira seca crean un contraste harmónico cos obxectos gráficos.

8. Almacenaxe versátil Crea un sistema de almacenaxe á túa medida. Dálle a volta ao uso orixinal das cousas. Aquí temos accesorios de roupa colgando de ganchos do departamento de cociñas nunha escaleira fixada á parede do dormitorio.

Sacamos todas estas ideas da casa de Anita, en Noruega. «Como decoradora e paisaxista, sempre intento innovar na miña forma de colocar os obxectos. Polo xeral teño unha capacidade de visualización moi alta e non desconecto iso nunca, nin sequera cando saio a correr polo bosque», explica. Podes ver toda a casa de Anita aquí.