Ideas para decorar un dormitorio universitario realmente acolledor

Como son os dormitorios universitarios 

Os cuartos de universitarios, xa sexan os dunha residencia ou os dun piso en alugueiro, caracterízanse por 3 cousas: son pequenos, ás veces algo escuros e nunca están decorados como nos gustaría.  

Porén, cos trucos adecuados, podemos reconverter esta estancia e darlle un aire completamente diferente e facela máis… como diriamos? Máis "nosa". Ademais, cun pouquiño de maxia, teremos ata máis espazo, que nunca vén mal! 

Para axudarche a interiorizar como personalizar o teu dormitorio universitario de forma orixinal e acolledora, recorremos a unha das nosas decoradoras de confianza, Emma, que, coa súa experiencia persoal da súa etapa universitaria en Londres, nos dará as claves que necesitas.  

"Cando estudaba na universidade, vivía nun apartamento diminuto en Islington, ao norte de Londres, co meu mozo (agora marido). Antes era unha cafetería, co seu escaparate e todo. Era preciosa, pero estaba entre dous edificios vitorianos antigos, e só medía 2 metros de ancho! Non tiñamos nin un centímetro de espazo de almacenaxe, e a cociña e o baño estaban no soto. Pasabamos a vida subindo e baixando aquelas escaleiras tan estreitas", explica. 

Os imprescindibles dun cuarto universitario 

Nun dormitorio universitario non pode faltar unha cama cómoda, xa que será o corazón do cuarto. E, como conseguir unha coma esta? Segundo nos explica Emma, "debe ter moitas almofadas, un edredón cálido (nós tinximos a roupa de cama para darlle un toque máis persoal), luciñas de fantasía, uns tallos amontoables que sirvan como mesa de noite e un dosel". 

E si, sabemos o que estás pensando, como decoro o meu dormitorio se está prohibido facer buracos na parede? Fronte a este impedimento, Emma dános a seguinte solución: "puxen unha barra de cortina de ducha regulable encima da ventá para colgar o dosel. Realmente fai que o dormitorio resulte moito máis acolledor e sen necesidade de cravar nada". Ademais, sempre podes recorrer a decorar con láminas ou fotografías e colocar un pouco de fita adhesiva de dobre cara.  

Trucos para a roupa e os complementos

Dado o seu tamaño reducido, os cuartos universitarios precisan varios trucos para teren máis espazo, sobre todo para gardar a roupa. O consello por excelencia, aínda que sexa obvio, é que reine a orde. Esta será a única maneira de que colla (case) todo.  

Por exemplo, podes utilizar unhas caixas con tapa para gardar a roupa máis gorda ou os zapatos debaixo da cama. Así colleranche un monte de cousas e non ocuparán sitio ningún. Tamén é interesante que te axudes do famoso almacenaxe vertical. Que é iso? Pois algo tan sinxelo como aproveitar o espazo das paredes. Colgadoiros para as portas, que che serven tanto para os bolsos e mochilas como para as chaquetas e panos, ou organizadores de armarios colgantes para ter andeis adicionais dentro dos armarios, son algúns dos complementos que che facilitarán a vida neste sentido e, ademais, sairanche moi económicos! 

"Encántame a roupa! Como dispoño de pouco espazo, teño que ser creativa e atopalo dunha maneira orixinal. Para as cousas que quero ter gardadas, puxen unha cómoda e un armario pequeno. Para as que quero expoñer, utilizo unha barra de cortina de ducha regulable. Atréveste a facer algo máis orixinal? Colle unha porta vella ou un taboleiro de madeira e píntao dunha cor que che guste, ponlle uns cantos ganchos e pomos (para colgar bolsos, bixutería etc.) e apóiao na parede". 

Onde colocar os libros e o material de clase

"Na miña época de universitaria, tiña montañas e montañas de libros. Cando tiña orzamento de estudante, usaba un monte de caixas vellas para gardalas. Recreei aquí esta imaxe cunhas caixas KNAGGLIG que pintamos para adaptalas á combinación de cores empoadas en tons pastel do cuarto", di Emma. "Se queres aforrar aínda máis espazo, ponas debaixo do escritorio".

Para poder estudar e escribir en condicións, precísase moito espazo. Aproveita a altura do dormitorio para poñer solucións na parede que che permitan ter o escritorio despexado (e con sitio para poñer as túas obras de arte favoritas). Se podes, aconsellámosche que uses andeis adicionais para montar un estante encima da mesa. Tamén pode valerche un flexo con pinza para que non che ocupe sitio na mesa, e incluso unha minicómoda para gardar todos eses obxectos miúdos que sempre acaban ciscados. Ah! E case se nos esquece, algo que vai de categoría é un taboleiro perforado no que poder poñer diferentes complementos, como cestas e estantes.  

Unha despensa improvisada

"Unha das cousas que máis me amolaba cando era estudante era ter que estar subindo e baixando escaleiras para ir á cociña. Se a túa situación é parecida á miña, ou se tes unha cociña compartida, recoméndoche dous carros, un con cousas para usar na cociña común (como pasta e tomate envasado, por exemplo), e un estante inferior para os pratos que están listos para lavar. Podes encher o outro con aperitivos e bebidas preparados para o teu cuarto. Tamén podes ter unha teteira eléctrica para o té, unha torradora, unha cafeteira de émbolo etc." 

E resulta que os carros auxiliares son realmente útiles. Ademais dos consellos de Emma, recomendámosche que os teñas en conta como aliados para a zona de estudo. Se non puideches utilizar a técnica dos estantes e o taboleiro da parede, coloca un destes carros e garda nel todos os obxectos que máis utilizas. Farache servizo como moble de caixóns, pero co beneficio engadido de que ocupa menos e ten rodas. Que che parece? 

E listo! Aplica estes consellos no teu dormitorio e goza coa transformación e o resultado final. Conseguirás un cuarto moderno, práctico e moi pero que moi bonito.