3 receitas de sobremesas caseiras para gozar cociñando

1. Torta de arandos 

Ingredientes: 

• 350 g de fariña
• 250 g de manteiga
• 100 g de azucre  
• Marmelada de arandos
• 1 ovo
• 100 ml de auga fría

Preparación:  

1. Peneira a fariña co azucre nun cunco. 
2. Engade a manteiga á fariña e lígaa coa fariña pouco a pouco. É importante que a manteiga estea fría, acabada de sacar do frigorífico.  
3. Incorpora a auga fría aos poucos (se for preciso, métea previamente no conxelador) e sigue amasando ata acadar unha mestura homoxénea.  
4. Divide a masa en dúas partes iguais e esténdeas cun rodete ata conseguires un diámetro duns 15 cm en cada unha.  
5. Gárdaas no frigorífico durante, polo menos, media hora.  

6. Pasado este tempo, sácaas e colócaas sobre o mesado cunha pouca fariña para que non se apeguen.  
7. Estíraas cun rodete ata conseguir que queden redondas, midan uns 30 cm de diámetro e teñan un grosor de entre 3 e 4 mm.  
8. Coloca unha das masas no molde como base. Recorta os bordos sobrantes. 
9. Reenche a torta coa marmelada de arandos.
10. Corta a outra masa en tiras de 1 cm aproximadamente.  
11. Monta un enreixado coas tiras sobre a marmelada e sélaas coa axuda dun garfo.  
12. Refrixera a torta durante 30 minutos.  
13. Prequenta o forno a 190 ºC. 
14. Bate a xema do ovo e pinta a torta cun pincel.  
15. Enforna a torta durante uns 40 minutos ata que estea dourada. 
16. Sácaa, deixa que arrefríe e a gozar!  

2. Pan de plátano e froitos secos

Ingredientes: 

• 1 plátano 
• 2 ovos 
• 125 g de fariña de avea
• 100 g de azucre moreno 
• 1 presa de noces
• 1 presa de améndoas
• 1 presa de abelás
• 80 g de manteiga
• Canela ao gusto
• 1 sobre de fermento

Preparación:  

1. Pela o plátano, tórao e tritúrao nun cunco coa axuda dun garfo. 
2. Noutro cunco, mestura cunhas varas a manteiga en pomada (case derretida) co azucre ata quedaren integrados. 
3. Incorpora os ovos e o plátano. Sigue mesturando coas varas. 
4. Prequenta o forno a 170 ºC. 

5. Peneira a fariña xunto co fermento e a canela. Engádeos pouco a pouco ao cunco co resto dos ingredientes. Mestura ata acadar unha textura uniforme.  
6. Engraxa o molde con manteiga e verte a mestura.  
7. Engade os froitos secos por riba.  
8. Enforna durante uns 30 ou 40 minutos. Pasado este tempo, pincha o biscoito cun escarvadentes ou un garfo e comproba que sae limpo para verificar que está cociñado.  
9. Déixao repousar durante 10 ou 15 minutos antes de sacalo do molde. 
 

3. Madalenas de limón e vainilla

Ingredientes:  

• 3 ovos
• 200 g de fariña
• 180 g de azucre
• 50 ml de leite
• 190 ml de aceite de oliva suave
• 1 limón
• 1 sobre de fermento
• 1 chisco de sal
• Esencia de vainilla

Preparación:  

1. Peneira a fariña e pona nun cunco xunto co fermento e o chisco de sal. 
2. Rela o limón, incorpórao ao cunco e mestura os ingredientes. 
3. Noutro cunco, bate os ovos ata conseguires unha mestura escumosa.  
4. Engade o azucre e a esencia de vainilla aos poucos e ao gusto. Despois, continúa a bater ata que estean ben incorporados.  
5. Bota o leite e sigue batendo.  
6. Incorpora tamén o aceite de oliva e continúa batendo.  

7. Engade os ingredientes secos do outro cunco aos poucos sen deixar de bater. É importante que a masa non teña bolborotos. 
8. Cando a mestura sexa homoxénea, tapa o cunco con filme transparente e déixaa repousar no frigorífico durante, polo menos, unha hora.  
9. Pasado este tempo, pon a prequentar o forno a 210 ºC.  
10. Saca a masa do frigorífico e repártea nos moldes para madalenas. Enche as tres cuartas partes de cada unidade, xa que a masa medrará no forno. Recomendámosche colocar cápsulas de papel de forno nos moldes para non se apegaren e sexa moito máis doado retiralas.  
11. Ciscalla un pouco de azucre granulado por riba das madalenas para que, ao enfornalas, se forme unha deliciosa cotra.  
12. Enforna durante 15 minutos a 210 ºC e comproba cun escarvadentes que a masa está ben cociñada antes de sacalas do forno. Se sae limpo, están listas! 
13. Déixaas repousar uns 5 minutos antes de retiralas do molde e despois colócaas sobre unha reixa ata que arrefríen.  
14. Sérveas canda unha cunca de café, un té ou a bebida que máis che guste, e a gozar!