5 receitas para unha grellada perfecta e diferente
Encántannos as grelladas! Pero aínda máis as grelladas que se distinguen un pouco das receitas clásicas e van un paso máis alá, para convertelas nunha auténtica experiencia culinaria ao aire libre. Se a ti te pasa o mesmo, toma nota destas ideas para a próxima que organices.
Cando pensamos nunha grellada, rapidamente nos veñen á mente unha serie de pratos coma as espetadas mouras, o chourizo ou o touciño entrefebrado, a que si? Porén, as posibilidades que ofrece a cociña na grella son moito máis variadas e deliciosas. Así que se queres sorprender aos teus convidados esta vez, propoñémosche varias receitas de grella coas que chucharán os dedos.
E non te preocupes, porque o feito de que sexan máis orixinais non implica que sexan máis complicadas. De feito, como verás, en moitos casos só supón darlle un xiro a algunhas propostas clásicas para que sexan máis especiais. Ao choio!
1. Zanquiños de polo bañados con salsa barbacoa e piña
Ingredientes:
- 10 zancos de polo
- 1 piña
- 6/7 culleradas de salsa barbacoa
- 1 culleradiña de salsa de soia
- 1 culleradiña de azucre moreno
- Pementos do piquillo
Preparación:
- Lava os zancos de polo e sécaos.
- Mestura nun cunco a salsa barbacoa coa salsa de soia e o azucre moreno.
- Coloca todos os zanquiños de xeito que estean cubertos pola salsa e déixaos sobre media hora no frigorífico.
- Un pouco antes de cociñar, corta en rodas a piña e lava os pementos.
- Leva todo á grella e cocíñao ata conseguir o punto desexado.
2. Hamburguesas cheas de cor
Ingredientes:
- Hamburguesas de tenreira ou polo
- Pans de hamburguesa
- 1 col lombarda grande
- 3 ou 4 aguacates grandes
- Tomates cereixa
- 2 ou 3 ceboliñas
- 1 ou 2 limóns
- Pementa
- Sal
- Salsas (ketchup, mostaza…)
Preparación:
- Cociña as hamburguesas na grella.
- Pica a cebola en xuliana e cocíñaa tamén na grella.
- Lava a col lombarda e córtaa en tiras curtas.
- Abre os aguacates e córtaos en rodas non moi grandes.
- Alíñaos con limón, pementa e sal.
- Parte en dous os tomates cereixa.
- Cando a carne e a cebola estean listas, monta as hamburguesas: coloca unha base de col lombarda, aguacate, a carne, os tomates cereixa e a cebola.
- Deixa que os teus convidados lles dean o toque especial coas súas salsas favoritas.
3. Espetadas de peixe mariñadas con salsa de aneto e limón
Ingredientes:
- 3 tacos de peixe firme por espetada (peixe sapo, mero, atún…)
- ½ limón por espetada
- A nosa salsa de aneto e limón
- Ceboliño
- Pementa
- Sal
Preparación:
- Pide na peixería que te corten o peixe en anacos para facer espetadas.
- Lava o peixe.
- Pon a salsa nun cunco e somerxe os anacos de peixe a mariñar durante 2 horas no frigorífico.
- Cando pase ese tempo, corta en anacos os limóns.
- Coloca tres anacos de peixe e tres cachos de limón alternados en cada espetada.
-
Bota sal e pementa ao gusto e decora co ceboliño.
- Cociña as espetadas na grella por ambos lados ata que douren.
4. Burritos veganos
Ingredientes:
- Salchichas veganas
- Tortillas de trigo
- Gromos variados
- 2 ou 3 aguacates grandes
- 2 cebolas moradas
- Aceite de oliva virxe extra
- Pementa
- Sal
Preparación:
- Cociña as salchichas na grella.
- Cando estean case listas, pasa as tortillas tamén pola grella para tostalas.
- Abre os aguacates e párteos en rodas.
- Lava os gromos e pica a cebola.
- Mestura todos os vexetais nun cunco e alíñaos ao teu gusto con aceite de oliva, pementa e sal.
- Monta os burritos veganos. Para iso, podes deixar as salchichas enteiras ou cortalas en cachos.
5. Salmón con mostaza e alcachofas
Ingredientes:
- 6 lombos de salmón
- 100 ml de aceite de oliva virxe extra
- 2 limóns
- 2 culleradas de mostaza granulada
- Pementa negra
- Sal
- Alcachofas
Preparación:
- Espreme os dous limóns.
- Prepara un cunco co aceite, a cebola, o zume de limón, a mostaza, a pementa e o sal.
- Pon os lombos de salmón no cunco, tápao con filme transparente e deixa mariñar durante un mínimo de dúas horas no frigorífico.
- Un pouco antes de cociñar, parte as alcachofas e bótalles sal e pementa.
- Leva todo á grella e cocíñao ata conseguir o punto desexado.
Cal destas receitas prepararás? Antes de que comeces a cociñar, recomendámosche ler estes artigos para que á túa grellada non lle falte ningún detalle. Por unha banda, algunhas receitas de verán como ensaladas que podes servir como acompañantes, e por outra, ideas de decoración. Toma nota!
Encántanos que os clientes utilicen os nosos produtos dunha forma creativa. Atrévete ti tamén! Porén, debes ter en conta que as modificacións e cambios que introduzas nos produtos de IKEA impiden que se poidan volver vender ou empregar para o seu uso orixinal, polo que invalidan as garantías comerciais de IKEA e o dereito a devolución.
