6 ideas orixinais para organizar o armario e os complementos

1. Organiza a parede como un armario aberto

Se tes unha parede libre no dormitorio, utilízaa para crear un roupeiro aberto no que colocar a roupa e os complementos. A continuación recomendámosche algunhas ideas para que quede perfecto:

• Un espello de pé para que poidas verte de corpo enteiro.
• Se non gardaches no seu día as caixas de zapatos, utiliza outras caixas de almacenaxe (mellor monocromáticas) para gardar e amorear o calzado xunto con todo tipo de complementos.
• Varios ganchos en liña e a diferentes alturas ancorados na parede para a roupa.
• Máis ganchos e guías para os complementos máis pequenos, como as xoias ou os cintos.

Se non dispós dunha parede completa, utiliza os espazos pequenos, como fixemos na imaxe. Neste caso, sacámoslle partido ao oco enriba do moble e penduramos unha barra para colocar a roupa que queremos poñer ao día seguinte ou, simplemente, airear algunha peza antes de gardala. Ademais, colocamos á esquerda un par de ganchos para pendurar obxectos pequenos, como o bolso, e aínda queda espazo na cómoda para poñer os complementos en caixas. Que che parece?

2. Como organizar zapatos e complementos

Cando organizamos o dormitorio, os zapatos son un dos grandes retos. Neste caso, atopamos unha solución bastante sinxela. Mira:

Apostamos por deixar o calzado na parte máis baixa do armario, xusto debaixo das cestas da roupa. Deste xeito, terémolo sempre á man e non haberá perigo de ensuciar a roupa.

Porén, deixamos ao aire libre os zapatos que utilizamos acotío, ou os que teñen unha forma máis peculiar. Non esquezas que podes gardar os que non sexan de tempada en caixas de almacenaxe, tanto enriba do armario como debaixo da cama (lugares moi discretos, aproveitables e infalibles). Colocamos o resto de zapatos nunhas prácticas caixas semitransparentes na parte dereita e aproveitamos a almacenaxe en vertical. Deste xeito, sempre teremos os zapatos gardados e poderemos atopalos dunha ollada.

3. Un truco para ter máis espazo no armario

Enchiches todos os andeis e caixóns do armario? Se precisas máis espazo, podes utilizar este complemento do máis práctico, económico e orixinal que che amosamos a continuación.

Grazas aos seus 7 compartimentos, con este sistema de almacenaxe podes crear unha estrutura a maiores dentro do teu propio armario sen apenas esforzo. Só tes que despregalo e penduralo da barra do armario. A que é sinxelo? É perfecto para gardar todo tipo de pezas. Neste caso, optamos por colocar camisetas, xerseis e suadoiros, pero podes utilizalo para o que queiras, como os zapatos e os pantalóns. Nos dous últimos compartimentos, os máis estreitos, colocamos unhas caixiñas nas que podes gardar, por exemplo, os cintos ou os complementos que prefiras non ter á vista.

Sabías que este sistema de almacenaxe, ademais de económico, está feito de poliéster reciclado? Isto permítenos reducir o consumo de novas materias primas e diminuír o noso impacto ambiental. É xenial!

4. Crea o teu propio toucador

É posible que non teñas espazo no dormitorio para outro moble ou simplemente pode que queiras colocar os teus esenciais de día dun xeito diferente. Que che parece esta opción? Pódela crear ti mesmo cun par de complementos. Contámosche polo miúdo.

Como comentamos ao principio, un espello de parede é fundamental para poder mirarnos unha última vez antes de saír da casa. Por iso, reserva un oco para colocar un que reflicta a túa mellor versión de arriba a abaixo. Se queres, tamén podes engadir un foco xusto enriba para que non che falte luz e poidas retocarte ou verte sen problemas se está a contraluz coa fiestra ou con outro foco. Utilizaralo máis dunha vez!

Por último, utilizamos o enxeño e atopamos un novo uso para o moble que colocamos xusto ao lado. Sabes que era orixinariamente unha estrutura para a cociña? Os estantes abertos permítennos colocar todos os nosos complementos: a colonia, o cepillo do pelo... Ademais, esta estrutura conta con accesorios adicionais moi útiles e discretos, como os ganchos inferiores que utilizamos para pendurar os reloxos. A que queda moi ben?

5. Unha solución para decorar coas túas plantas

Nesta zona de organización de roupa e complementos fáltanos un toque decorativo para completala do mellor xeito posible. Se tes plantas no teu dormitorio, pode que esta idea che axude a aproveitar mellor o espazo sen renunciar a unha bonita decoración.

Podes aproveitar a altura das paredes, e mesmo do teito, para pendurar as nosas plantas e crear un xardín flotante. Engade tamén testos feitos de materiais naturais para dar un toque máis acolledor ao teu espazo. Os que amosamos na foto están feito cun material renovable: o bambú.

6. Complementos versátiles

Encántanos todas as ideas de organización para este dormitorio que fomos creando pasiño a pasiño porque, ademais de económicas e bonitas, son realmente prácticas. Ti tamén podes conseguilo no teu cuarto!

Pon atención a cada recanto aproveitable, ten en conta as túas rutinas e busca a solución que mellor se adapte Verás como o consegues! Como consello final, recomendámosche que non te precipites e busques complementos versátiles e camaleónicos que se adapten a calquera espazo. Non hai límites!

Se quixeres ideas rápidas e sinxelas para ordenar o armario, non perdas este vídeo!