Cultiva os teus propios fungos a partir dos pousos do café
Sabes que cando fas café só aproveitas menos do 1 % dos nutrientes que conteñen os grans? No canto de tirar o 99 % restante, por que non o convertes na base dunha plantación de fungos?
En "A comida do mañá", o novo libro do laboratorio de deseño e investigación SPACE10, explícasenos como plantar fungos comestibles. O único que precisas son os pousos de facer café, micelio e un tarro de vidro. Ah, e unha pouca de paciencia! Precisarás entre 6 e 8 semanas para poderes recoller os froitos.
Material
Fita microporosa
Pódela mercar na farmacia.
Tapa hermética
Unha tapa metálica de rosca é máis doada de furar que se é de vidro.
Tarro de vidro grande
Pousos de café usados
Asegúrate de deixalos arrefriar, se non, ao mesturarse, pode que a calor mate todo o micelio.
Micelio
Estrutura vexetativa dos fungos. Para atopalo, ponte en contacto cos cultivadores de fungos da túa zona.
Faino así
- Para cultivar fungos, é fundamental a hixiene. Así que, antes de empezares, lava ben as mans con xabón e algún desinfectante.
- Fura dous buracos na tapa de aproximadamente 20 mm de diámetro cada un. Para que os bordos dos buracos queden ben, pon unha peza de madeira por riba da tapa e outra debaixo, asegura o conxunto cunha abrazadeira e fúrao todo xunto. Se tes dúbidas, podes buscar máis información en Internet.
- A continuación, esteriliza a tapa e o tarro somerxéndoos en auga fervendo durante un minuto. Sécaos e tapa os dous buracos da tapa coa fita microporosa para te asegurares de que non poidan entrar bacterias.
- Mestura no tarro o micelio cos pousos dun café feito hai pouco. Tápao e gárdao nun lugar escuro. Mantén a temperatura a 20-25 °C durante 2-3 días ata que os pousos queden totalmente cubertos polo micelio branco. A continuación, engade 1-2 cm de pousos de café que acabes de facer e espera a que o micelio o volva cubrir. Sigue ata que o tarro estea cheo de pousos.
- Cando os últimos pousos estean brancos, coloca o tarro nun lugar húmido e ben iluminado a unha temperatura de 15-20 °C. Evita a luz directa do sol. Tras 10-14 días, brotarán os fungos de ostra polos buracos da tapa e apartarán a fita microporosa. Se a fita non se desprende soa, axuda un pouco aos fungos.
- Colléitaos cando haxa un grupo e os sombreiros estean horizontais. Trala segunda ou terceira colleita, o tarro xa non producirá máis fungos. Retira o 80 % do substrato, pon unha nova fita microporosa e engade novos pousos ao tarro. Xa o tes todo preparado para unha segunda ronda.
"A comida do mañá" e SPACE10
Foto dos fungos: Kasper Kristoffersen
Encántanos que os clientes utilicen os nosos produtos dunha forma creativa. Atrévete ti tamén! Porén, debes ter en conta que as modificacións e cambios que introduzas nos produtos de IKEA impiden que se poidan volver vender ou empregar para o seu uso orixinal, polo que invalidan as garantías comerciais de IKEA e o dereito a devolución.
