Como limpar as alfombras
Limpar as alfombras non é complicado, pero si require certos coñecementos e algo de atención. Por que? Porque dependerá do material do que estiver feita e da mancha ou da sucidade que queiramos limpar. Como en todos os consellos de limpeza que damos, o máis importante é poñer mil ollos ás instrucións do fabricante que hai na etiqueta. Nela verás o que precisas para limpar a alfombra correctamente.
Se non tiveres unha etiqueta á que recorrer ou queres novos consellos sobre como limpar as alfombras da casa, non perdas de vista estas pautas.
1. Alfombras de la: guía básica para limpalas
Sabías que cada alfombra de la é única? Ademais, resisten moi ben a sucidade e o uso, polo que son ideais para o salón ou o dormitorio. Por suposto, non debes lavala á máquina nin empregar lixivia sobre ela. Velaquí tes outros consellos para limpala e tela perfecta:
- As alfombras novas de la desprenden peluxe, pero non te preocupes. Simplemente terás que aspirala con máis frecuencia ao principio.
- Faino a miúdo, polo menos unha vez á semana, e sempre co accesorio estándar de chan. O mesmo que para o resto da casa, non o rotatorio.
- Podes eliminar as manchas secas decontado se fretas con coidado cara ao centro da mancha.
- Non fretes as manchas húmidas. É moito mellor absorbelas con papel de cociña e humedecelas cun pano e un limpador suave.
Ademais, as alfombras de la son moi especiais para nós. Queres saber por que?
2. Alfombras sintéticas: déixaas perfectas
As alfombras sintéticas teñen algo en común coas de la: necesitan os mesmos coidados que viamos máis arriba. É dicir, que debes aspiralas a miúdo, non lavalas na lavadora, non limpalas con lixivia e seguir as instrucións de lavado de manchas que comentabamos.
3. Limpar as alfombras de fibras naturais
As alfombras de fibras naturais tampouco debemos lavalas a máquina, como é lóxico. Se queres eliminar o cheiro a novo tan característico que moitos destes modelos teñen ao principio, airéaas durante unhas horas e despois pásalles o aspirador. Aspíraas e sacúdeas a miúdo para evitar que o po se acumule entre as fibras.
E, se queres unha limpeza un pouco máis a fondo, pasa un pano con auga e xabón ben escorrido pola alfombra, e sécaa con outro seco, con papel de cociña ou aireándoa.
4. Así se limpa unha alfombra de algodón
A que ves na imaxe é a nosa alfombra TIPHEDE, fabricada con algodón reciclado. Outro material que nos parece fantástico e que tamén é moi especial para IKEA.
Isto é o que debes facer se queres saber como limpar unha alfombra de algodón:
- Debemos lavala á máquina a 40 °C como máximo, en tratamento normal. Apenas encolle 5 %.
- Non empregar lixivia.
- Pasar o ferro a 150 °C como máximo.
- O máis recomendable para manter a forma intacta após lavala é colgala para secala.
- Aspira e rota a alfombra con regularidade todas semanas, se for posible.
5. Máis trucos para limpar alfombras
- Cando se manche, dá igual de que, o mellor remedio é a rapidez: elimina a mancha decontado.
- Normalmente, o mellor é retirar con papel absorbente o líquido sen fretar para evitar que se esparexe.
- Non uses un pano demasiado mollado para acabar coa mancha ou farás que se estenda.
- Utiliza un quitamanchas específico de alfombras e sigue as instrucións do fabricante. E, aínda así, próbao antes nunha zona non visible da alfombra para estar seguro de que non se come a cor nin a estraga.
Encántanos que os clientes utilicen os nosos produtos dunha forma creativa. Atrévete ti tamén! Porén, debes ter en conta que as modificacións e cambios que introduzas nos produtos de IKEA impiden que se poidan volver vender ou empregar para o seu uso orixinal, polo que invalidan as garantías comerciais de IKEA e o dereito a devolución.
