Que se pode levar de comer á praia?
A época de praia e piscina xa está aquí! E as longas xornadas de sol coa única preocupación de gozar son xa unha realidade. Pero durante as nosas vacacións non sempre podemos comer e cear fóra, verdade? Por iso, unha das opcións que máis nos gusta é a de levar a comida á praia. Así, temos a total liberdade de picar algo cando e como nos apeteza, sen présas e aforrando.
Imos ver que se pode levar de comer á praia, como transportalo e que erros non debes cometer. Feliz día de sol e sal!
Friameiras e bolsa axeitada para a comida
O primeiro que debes ter en conta é como levar axeitadamente a comida á praia. O certo é que non podes levala de calquera xeito se o que pretendes é que mantela perfecta durante o maior número de horas posible. Imos ver algúns consellos:
- Aposta por friameiras herméticas que pechen á perfección: non queremos fugas!
- A nosa recomendación é levares a comida sempre en friameiras de cristal.
- Bolsas herméticas para gardar a froita xa cortada, froitos secos e os cubertos.
- Todo iso deberá ir nunha mochila, bolsa ou neveira con material illante para que os alimentos se conserven en perfectas condicións de temperatura durante toda a xornada.
- Deixa sempre esa bolsa ben pechada e á sombra, baixo o parasol. Pon por riba unha toalla ou pareo para resgardala aínda mellor do sol.
As mellores comidas para levar á praia
Para comer na praia o mellor son as opcións “cómodas”, é dicir, que sexan fáciles de manducar sen necesidade de pratos ou sen manchármonos en exceso. Por iso, estas son as nosas recomendacións para que saibas que podes levar de comer á praia sen complicacións:
- Bocadillos e sándwichs son boas opcións pola comodidade á hora de comelos. Evita que leven ovo ou maionesa.
- A ensalada de pasta é un dos pratos estrela dos días de praia, verdade? É fresquiña, rápida de facer, moi fácil de personalizar e aínda máis sinxela de comer, dende a mesma friameira.
- Outro tipo de ensaladas como de quinoa, de garavanzos, de salmón ou de lentellas. Igual de ricas e igual de fáciles de comer!
- Gazpachos ou salmorejos fresquiños.
- Quen non comeu nunca na praia os xa míticos filetes empanados? Pois tampouco son unha mala opción de cando en cando, sobre todo para os máis peques! Podes probar a facelos no forno, para buscar a opción máis saudable.
- Evita os fritos.
Como levar a froita á praia
A froita é unha das nosas opcións favoritas para levar á praia. Por que? Porque fresquiña é unha delicia, porque achéganos auga, hidrátanos, proporciónanos antioxidantes... O que vén sendo unha marabilla!
En canto a como levar a froita á praia, dependerá máis ben do tipo: nectarinas, ameixas, plátanos ou mazás, mellor enteiras e sen pelar. Melocotóns, sandía ou melón, o mellor é levalas xa partidas e nunha friameira acompañadas dun garfo. Outra opción que nos encanta é preparar macedonias de varias froitas ou engadila á nosa ensalada de pasta ou legumes.
Que non levar á praia e outros erros
Aínda que a tortilla de patacas é un dos pratos típicos de praia, o certo é que non é demasiado recomendable. A salmonela e o verán son un tándem habitual e temido. Evita maionesa, ovos e lácteos. O mellor é substituír o iogur ou batido de sobremesa por unha boa peza de froita e prescindir do chocolate.
Por outra banda, un erro moi habitual é levar a neveira medio baleira. Sabías que canto máis chea, mellor conserva o frío e, polo tanto, os alimentos? Evita tamén enchela de xeos que ao final acabarán humedecendo todo.
Por último, non coloques comida e bebida xuntas. Por que? Porque adoitamos beber moito máis do que comemos, loxicamente, e estar abrindo e pechando continuamente a neveira poder facer que aumente a temperatura interior da mesma, estragando os alimentos.
Un lugar no que acomodarte
Tan importante como a comida que levamos á praia é o lugar no que a saboreamos. Este o momento de pensar como crear o lugar perfecto para relaxarte e gozar dese día de sol tan merecido. Unha boa hamaca, un parasol, a toalla... Todo será fundamental para comer tranquilamente á sombra cunha boa cantidade de protección solar enriba. Non esquezas as pas para botar unha partida antes de comer e abrir o estómago!
Antes de marchar, non perdas:
Encántanos que os clientes utilicen os nosos produtos dunha forma creativa. Atrévete ti tamén! Porén, debes ter en conta que as modificacións e cambios que introduzas nos produtos de IKEA impiden que se poidan volver vender ou empregar para o seu uso orixinal, polo que invalidan as garantías comerciais de IKEA e o dereito a devolución.
