Barkhult jatetxea

Familiako baserria eskaerak jasotzeko prest

Bazkarien, afarien eta cateringaren negozioan hainbeste urte eman eta gero, Martin Roman aurpegi ezaguna da Älmhult-eko jatetxe-zaleentzat. Orain pauso bat aurrera egin du eta publikoa bere etxera gonbidatu du.

"Hemengo jendeak berezko pentsaera dauka. Haien jarrera positibotik datorkien mentalitate ekintzailea daukate. Beti dago konponbideren bat, behar duzun guztia azkartasuna eta lanari ekitea da".

Martinek badaki zertaz ari den. IKEA-ren jaioterria izateaz gain, Älmhult Martinen sorlekua ere bada. Zehazki, handik gertu dagoen Barkhult baserrian hazi zen. Urteak igaro ditu Älmhult-eko aldirietan jatetxeak zuzentzen, hortaz, ez zaio arrotza negozio berrietan hastea. Orain, bere negozioa etxera gerturatuko du. 

Pausoz pauso: gertaera ezohikotik eguneroko negoziora

"Barkhult nire familiarena izan da hainbat belaunaldietan zehar, baina, gaur egun, ez gara ia nekazaritzan aritzen. Duela urte batzuk, jatetxeen osagarri gisa erabiltzea bururatu zitzaigun, familia-bileretarako ez ezik, beste okasioetarako ere bai. Saiakera batzuk egin genituen eta oso ondo atera ziren. Harrezkeroztik, Barkhult puntu nagusi izatera pasatu da pixkanaka-pixkanaka". Noizean behingo ekitaldiekin hasi ziren, ezkontza bat hemendik, hitzaldi bat handik... gerora, ekitaldiak geroz eta maizago antolatu dituzte. "Gure pizzak, napoliar erara eginak, oso ezagun egin dira. Horrez gain, sasoiaren arabera, barbakoak eta Suediako smorgasbord tradizionala ere egiten ditugu; eta igandeetako hamaiketakoak, nola ez".

Zaharraren eta berriaren arteko nahasketa landatarra

Älmhult-en negozio bat zuzendu behar bada, ziurrenik IKEA tartean egongo da, modu batean edo bestean. "IKEA-ko lankideak beti izan dira bezero leialak, beraz, naturala iruditu zitzaidan haiengana jotzea aholku eske. Barkhult eraberritu nahi genuen jende gehiago hartzeko, baina ez genuen egurrezko aletegiaren esentzia galdu nahi. Ideia-truke bikaina izan genuen barne-diseinatzaileekin, eta emaitza bi munduen arteko alderik onena ateratzea izan da".