Ezagutu lorezaintzaren onura nagusiak
Jarduera oso atsegina eta entretenigarria izateaz gain, zientziak iradokitzen du eragin positiboa duela lorezaintza egiten dutenengan. Lorezaintzaren onura nagusiak zein diren kontatuko dizkizugu, ezagutzen dituzunean, zuk ere hasi nahiko duzu landareak landatzen!
1. Sistema immunologikoa indartzen du
Alnarpen dagoen SLUk, Nekazaritza Zientzien Unibertsitateak, dioenez, landareekin kontaktu fisikoa izateak ondorio mesedegarriak izan ditzake, baita sendagarriak ere. Sistema immunologikoan duen ondorio positibo hori handiagoa da aire zabalean praktikatzen denean. Izan ere, eguzki-argia jasotzen denez, D bitaminaren maila igo egiten da, eta bitamina horrek sistema immunologikoaren prozesu desberdinetan esku hartzen du eta kaltzioa xurgatzen laguntzeko du, besteak beste.
Noski, eguzkipean egotea arriskutsua ez izateko, garrantzitsua da eguneko ordu beroenetan (12-16 h) ez egitea eta eguzki-krema eta kapelak erabiltzea.
2. Estresa gutxitzen du
Bizirauteko estresak funtzio positiboa badu ere, arriskuen aurrean erreakzionatzen laguntzen digulako, oso maiz sortzen bada, oso kaltegarria izan daiteke osasunerako eta arazoak izan ditzake bizimodu normala egiteko estresa jasaten duen horrek. Horregatik, lehentasun osoa du estresa murrizteko moduak aurkitzea, egoera horrek denbora luzean iraunez gero.
Zure kasua da? Albiste onak ditugu! Journal of Health Psychology aldizkarian argitaratutako ikerketa baten arabera, egunean ordu erdi igaroz gero lorezaintzako edo laborantzako lanetan, kortisol mailak murrizten dira, estresa erregulatzeaz arduratzen den hormona.
3. Sasoian mantentzen laguntzen du
Lorezaintzak eta laborantzaren zaintzak mugimendu fisiko aerobikoa behar du. Lan bakoitzak eskatzen duen intentsitatea desberdina bada ere, badira indar handia eskatzen duten lanak ere. Egia esan, jarduera horretan emandako 45 minutu ariketa fiskoa ordu erdiz egitearen parekoa da; beraz, egunero edo astean hainbat alditan eginez gero, oso egokia da sasoian mantentzeko.
Beraz, kaloria gehiago nola erre ez badakizu eta lorezaintza deigarria egiten bazaizu, utzi zalantzak albo batera eta hasi landatzen. Ariketa kardiobaskularra egiteaz gain, koordinazioa ere lantzen da haziak landatzen direnean, eta indarra, mugimenduak errepikatzean. Oso jarduera osatua da!
4. Elikadura osasungarria bultzatzen du
Landareekin harremanetan egotea eta baratza koskor bat edo fruta-arbola batzuk izatea oso mesedegarria izan daiteke elikadurarako. Alde batetik, elikagaiak zaintzen dituzunean gehiago baloratzen dituzulako halako elikagaiak eta gehiago jango dituzu, eta horrek ondorio zuzena izango du zure osasunean. Bestetik, elikadura jasangarri bat edukiko duzu, elikaduraren zati bat zerorrek landatutakoa izango delako.
5. Autoestimua igotzen du
Norberaren proiektu bat izateak, kasu honetan, lorategi bat zaintzea eta egunero-egunero gure lanaren fruitua ikustea (kasu honetan hitzez hitz), norberaren gogobetetasuna eta autoestimua igotzen ditu. Dedikazio eta konstantzia apur batekin, zure lorategia edo baratza oso harro sentiaraziko zaituen leku zoragarria bihurtuko da. Probatu ezazu!
6. Aldartea hobetzen du
Autoestimua ez ezik, bizitzako egoeren aurrean askoz ere optimistagoa eta baikorragoa izaten ere lagun diezazuke lorezaintzak. Halaxe frogatu duten hainbat ikerketek. Ikerketa horien arabera, astean hainbat ordu lorezaintzan jarduten duten depresioa duten pertsonak nabarmen egiten dute hobera, lorezaintzan jarduten ez dutenekin alderatuta. Hori dela-eta, badira buru-osasuna hobetzea helburu duten baratza-terapiak.
7. Memoria hobetzen du
Lorezaintzak kortisol mailak murriztearen eraginez, estresa murrizteaz gain, kontzentratzeko eta ikasteko gaitasunak hobetu egiten dira. Eta ondorio horiek guztiak oso mesedegarriak dira memoriarako.
Gainera, kortisola murrizten laguntzeaz gain, jarduerak berak hainbat prozesu oso positibo jartzen ditu martxan burmuina aktibo mantentzeko. Beraz, jarduera oso osatua da memoria lantzeko.
8. Mesede egiten dio atsedenari
Estres-maila murriztearen eta jarduera fisikoa areagotzearen beste ondorio bat gaueko atsedenari mesede egitea da. Alde batetik, jarduera fisikoak ongi sentiaraziko gaituelako egunaren amaieran eta, bestetik, fisikoki nekatuago egongo garelako eta errazagoa izango zaigulako lo hartzea.
Zer deritzezu onura horiei guztiei? Ziur lorezaintzan hasteko irrikatan zaudela zure bizitzan islatuta ikusteko. Hala bada, hona hemen artikulu interesgarri pare bat lanari ekin baino lehen zure ezagutzak zabaltzeko.
Izugarri atsegin dugu bezeroek gure produktuak sormenez erabiltzea. Ausartu zaitez zu ere! Baina kontuan izan behar duzu IKEA taldeko produktuetan aldaketak eginez gero ezin izango ditugula berriz saldu edo hasieran zuten erabilerarako erabili; beraz, IKEA taldeko berme komertzialak eta itzultzeko eskubidea indargabetzen dira.
