KONSTRUERA Aurrealderik gabeko tiradera, zuria, 15x60 cm

SMÅSTAD biltegiaren bitartez, soluzio ona eman nahi genien haurrentzako biltegiei dagokienez familiek dituzten beharrizan eta erronkei. Hori dela eta, mundu osoko guraso eta haurrak elkarrizketatu genituen, beren goizeko errutinen berri eman ziezaguten eta beren armairuak erakuts ziezazkiguten.

Haurren garapena ere ikertu genuen eta aztertu genuen nola ebazten diren biltegiratze-beharrak eskoletan eta haur eskoletan. Egunero jasotzen genuen ezagutza eta esperientziak izugarri lagundu zigun gure lanean. Jaso genituen iritzi guztiak bat zetozen alderi batean; eguneroko errutinak eta jantzien aukeraketak erraz eragiten dute guraso eta seme-alaben arteko eztabaida. Hori horrela, nola lagun ziezaiekeen biltegiratze-soluzio batek errutinak elkarrekin errazago garatzen? Gure lanaren oinarria eraiki genuen horrela, eta gure lehendabiziko prototipoak prest zeudenean, adituak gonbidatu genituen berriro, gure ideiak txalotu edota bazter zitzaten.

Egiteko gogorra da familia gehienentzat: haur txikiek beren kabuz erabaki nahi dute eta helduek arrazoia eurena dela uste dute. Akaso ikusiko zenuen inoiz hiru urteko haur bat pentsatuz urtebetetze-festarako jantziak astelehen goizerako aukera aproposena direla. Beren kabuz aukeratzeko gai izatea eta beren jantziei begiratua eman ahal izatea benetan garrantzitsua da haurren garapenean, baina errazagoa izango da haientzat aukera horiek mugatuak (eta arrazoizkoak) badira. Horregatik, SMÅSTAD armairua maila ezberdinetan bana daiteke: goiko aldea, zeuk kontrolatzeko modukoa; eta behekoa, hiru urteko haur zorrotzak jantzi-sorta mugatu batean hautuak egiteko modukoa. Haurrak pixka bat engaiatzea da, badakigu, baina baliagarria da helburu ona lortze aldera: haurrak bere aukerak egin ahal izango ditu, aurrez hautatutako sorta horretan.

Iristear dagoen familiako kide berriari aurrea hartuta, pixoihalak eta arropak aldatzeko zein haurtxoaren zaintzari dagozkion gainerako egiteko guztietarako leku atsegin, seguru eta praktikoa presta dezakezu. Ondoren, haur jaioberriarekin etxera itzultzen zarenean, zoragarria izan daiteke guztia, baina baita norbera gainditzeko modukoa ere. Garbitzeko arropen multzoa handitu egiten da eta malabarak egiten saiatzen zara egin beharreko guztia egiteko eta, aldi berean, haurtxoa zaintzeko. SMÅSTAD serieko atalen konbinazioari esker (aldalekua eta biltegia) behar duzun guztia jarri ahal izango duzu kako eta tiraderetan, haurtxoa epeltasun eta maitasun osoz zaindu bitartean. Haurtxoa haziz doan neurrian, gero eta gehiago ohartzen da inguruan duenaz; aldalekuaren inguruan irudi koloretsuak jarri ahal izango dituzu, baita haren atentzioa bereganatuko duen mugikari bat eskegi ere. Pixoihal-garaia bukatutakoan, aldalekua erraz jaitsi eta mahai bilaka daiteke, bertan jolastu eta marrazteko.

Garai horretan, haurrak izugarri azkar hazi eta garatzen dira. Jokoa da garrantzitsuena, baina nor bere gauzez arduratzea eta bere kabuz janztea errutina garrantzitsuak dira, hazten eta independente sentitzen laguntzen baitiote haurrari. Gaitasun motor eta sentsorialak garatzeak denbora behar du, eta oso garrantzitsua da biltegiak egokituak eta iristeko errazak izatea. Haur askori, adibidez, zaila iruditzen zaie jantziak pertxan eskegi eta handik kentzea, baita neurri txikikoa izanda ere. Eta, gainera, armairua sakona bada, zaila izaten da atzealdean, punturik urrunenean dauden jantziak ikustea eta haietara iristea. Horregatik banatu genuen SMÅSTAD biltegia bi mailatan, haurrek aukera izan dezaten jantzi sorta jakin baten barruan nahi duten hura hautatzeko, dela kakoetatik, dela erretiluetatik, dela tiraderetatik. Goizeko errutinak sinplifikatzeko, etiketa-euskarrietan irudiak jar ditzakezu biltegia antolatzeko, horrela, bai zuk bai laur urteko seme-alabak erraz aurkituko dituzue galtzerdiak.

Garai zirraragarria da hau. Lagunek garrantzia bereganatzen dute, haurrak bere identitatea bilatzen du eta pozik erakusten ditu bere estilo eta interesak. Etxean, jostailu eta poster gustukoenak aldatu egin daitezke egun batetik bestera. Haurren garapenaren parte garrantzitsua da aldakortasuna eta, hori simulatzeko, SMÅSTAD biltegian jartzeko artelazkizko ateak pentsatu ditugu. Beren irudi eta gauza garrantzitsuen mundua sor dezakete bertan, horma zuloz bete beharrik izan gabe. Arropa lurrean pilatzea ez da ezohikoa, denetan pertxa konplexuak ez diren edozertan zentratuta baitaude. Pertxen ordez, hortaz, kakoak jar ditzakezu SMÅSTAD biltegiaren barrualdean zein kanpoaldean, eta horrela azkarrago eskegi ahal izango dira arropak, motxilak eta bestelakoak. Armairu ateragarriaren azpian tiradera bat dago, txukun gordeta egon behar duen guztia pilatzeko. Uste dugu soluzio sinpleak gustuko dituztela bai haurrek, bai gurasoek. Ideia ona, ezta?

Mundu osoko familiak bisitatu genituenean, konturatu ginen atedun armairu arrunt bat sakonegia eta altuegia izaten dela sarritan haurrentzat. Biltegi mota berri bat behar zuen SMÅSTAD produktuak, ez besterik. Gure sukaldeko serieetan inspiratuta bururatu zitzaigun sistema ateragarria duen biltegi egonkorra sortzea. Aditu txiki zein handiek, produktua probatzeko, armairuari tira egin ziotenean, harriduraz erantzun zuten gehienek. Izugarri gustatu zitzaien barruan zegoen guztia hain erraz ikusi ahal izatea eta guztia alde bietatik eskuratu ahal izatea. Azpiko ertz altuak egitura sendotzeko erabiltzen dira, baina, aldi berean, edozer gordetzeko tiradera ere osatzen dute; bertan gorde daitezke bai haurtxoaren pixoihalak, bai umearen jostailuak, bai nerabearen kirol-jantziak. Ideia ona, ezta?

Haurrekin bizitzeak ingurunea etengabe aldatzea dakar. Bat datoz horretan mundu osoko guraso gehienak. Jaka txiki geratu da bat-batean, peluxea haur txikiegientzako jolasa da, edota armairua neba-arreba txikiarekin partekatzeko ordua iritsi da. SMÅSTAD ahalik eta malguena lortze aldera, zenbait osagarri sortu ditugu, hala nola kako eta heldulekuak, etiketa-euskarriak eta ispilua; guztia beharrizanen arabera erraz gehitu edo eransteko modukoa.

Pentsatu al duzu inoiz zer itxura duen eskola bateko pasabideak? Kakoz beteta egon ohi dira, eta hori ez da kointzidentzia. Pertxak zailak dira adin gehienetako haurrentzat, eta ezinezkoa izan daiteke armairu batean multzo txukun eta tolestu batetik jantzi bat hartzea (baita jantzia multzora itzultzea ere). HJÄLPA eta LÄTTHET serieetako kakoak ondo egokitzen dira SMÅSTAD biltegiarekin, eta beste bi kako eredu berri ere gehitu zaizkie. Arropa-errailaren inguruan erants daitekeen bat, eta ate edo tiradera baten gainean jar daitekeen bat, atzealdea marrazki edo argazkiak jartzeko pintza gisa erabili ahal izateko. Kakoetan, arropez gain, motxilak, lepokoak, kapelak... ere eseki daitezke, azken batean, haurrek azkar eta erraz hartu nahi duten guztia.

Haurrek errepikapen eta errutinaren bidez ikasten dute, baina batzuetan laguntza pixka bat behar izaten dute bidetik. Haur eskolan, sinbolo eta ikurrak erabiltzen dira sarri bideratu eta gidatzeko laguntza gisa. Etxean ere, sinboloek bultzatu egin ditzakete eguneroko errutinak eta enbarazu egin gabe komunikatzeko bidea eskaintzen dute. HÄNGIG etiketa-euskarriaren bitartez, tiraderak sailka ditzakezu, galtzerdien, barruko arroparen edota jertseen irudiak jarrita, horrela errazago aurkituko du jantzi egokia oraindik erdi lo dagoen haurrak. HÄNGIG euskarriarekin datozen sinboloak erabil ditzakezu, edota haurrei utz diezaiekezu koloretako margoak erabiliz bere sinbolo propioak sor ditzaten. Etiketa-euskarriari esker, haurrak gai izango dira beren armairua nahi beste pertsonalizatzeko, eta kendu ezin diren pegatina zaharrek desespera zaitzaten saihestuko duzu.

Eskola-urteetan, gero eta garrantzitsuagoa da haurrek eurena baino ez den txokoa edukitzea, bertan eskulanak egiteko, jolasteko edota irakurtzeko, haiek bakarrik ala lagunen batekin. Baina beti ez da erraza izaten pribatutasun hori sortu ahal izatea anai-arrebekin gela partekatzen badute. SMÅSTAD ohe-egituraren bitartez, gelaren barruan beste gela bat sortu nahi genuen, eta espazio txiki batean ahalik eta gauza gehien sartu nahi genituen, ahalik eta malgutasun handienarekin. Ohearen azpian idazmahai bat eta armairu bat daude, eta horiek elkarrekin horma bat osatzen dute gelaren gainerako espazioarekiko; gainera, tiraderadun biltegiratze-sistemaren bat ere jartzen baduzu, nahikoa espazio egongo da gelan arropa, jostailuak eta eskolako gauzak gordetzeko. Kakoak, artelakizko ateak eta arretaz aukeratutako heldulekuak gehituz gero, "gela propioa" delako sentsazioa emango du ondo pentsatutako txoko horrek.

Zer iruditzen zaizkizu zurezko helduleku biribilak, edo kolore bizi eta estilo grafikodun metalezko heldulekuak? Biltegiratze-altzarien izaera zehazten dute heldulekuek, eta, horiek aldatuz, erraz aldatu dezakezu estiloa, kostu handirik gabe. SMÅSTAD egiturarako, BEGRIPA, PLOCKAR eta LAPPMES sortu ditugu, forma leunetako heldulekuak, haurren esku txikiek erraz oratu ditzaten egokitzen direnak. Haur nagusiagoentzat, JÄRNSPARV gezi formako heldulekuak daude; norabide ezberdinetara jarri daitezke, irudi dibertigarri eta pertsonala sortzeko eta nortasuna emateko.

Min ematen du ertz zorrotz baten kontra jotzeak, berdin du zenbat urte dituzun. Horregatik daude SMÅSTAD egiturako ate eta tiraderen bazterrak leun borobilduta. Biltegiratze-sistema osoa ahalik eta seguruena izan dadin, geure segurtasun-adituen laguntza izan dugu hasiera-hasieratik. Adin ezberdinetan izan daitezkeen arriskuak antzemateko entrenatuta daude. Esate baterako, bandek motelgailuak dituztenez, ateak leun-leun ixten dira eta, horrela, atzamarrak harrapatzeko arriskua murrizten da. Baina ahalik eta segurtasun-neurri zorrotzenak hartu behar dituzu etxean: finkatu beti hormara biltegiratze-altzariak, iraul daitezen saihesteko.

Atmosferako oreka mantentzen laguntzen dute basoek, arnas egiten dugun airea garbitzen dute eta uraren zikloaren parte dira. Biodibertsitate basatia elikatzen dute eta etxeak ematen dizkiete basoen beharra duten komunitate indigenei. Planetako animalia eta landare espezieen % 90ek basoak behar dituzte bizirauteko. Janarien, erregaien, egurraren eta ekosistemetako beste zerbitzu batzuen iturri dira. Gutxi gorabehera, urtero 19 milioi metro kubiko enborki jasotzen dituenez 50 bat herrialdetik, IKEA-k oso inpaktu handia du munduko basoetan eta egurraren industrian, eta, ondorioz, erantzukizun handia du egurra lortzeko moduan eragin positiboa izateko. Egurra arduraz biltzeak eta basoak arduraz kudeatzeak ziurtatzen dute basoen beharra duten pertsonen beharrak betetzen direla, negozioa jasangarria dela, basoko ekosistemak babesten direla eta biodibertsitatea hobetzen dela.

IKEA-n industriako estandar zorrotzekin lan egiten dugu basogintza arduratsua sustatzeko. Gure hornidura katean ez dugu onartzen legez kanpoko baso eremuetatik datorren egurrik edo kontserbazio balio handikorik edo gatazka soziala bizitzen ari diren eremukoetatik. IKEA-rekin lan egiten hasi baino lehen, hornitzaileek egiaztatu behar dute IKEA-ren baldintzak betetzen dituztela, egurraren jatorriari dagokionez. IKEA-k hornitzaile guztiei eskatzen die egurra iturri jasangarriagoetatik eskuratzeko (FSC ziurtagiria dutenetatik edo egur birziklatutik). Hornitzaile guztiak ikuskatzen dira aldizka eta baldintzak betetzen ez dituztenei eskatzen zaie ekintza zuzentzaileak egiteko berehala. Gure hornitzaileekin lan egiteari esker, harro gaude iturri jasangarriagoak izateko helburua lortu dugula iragartzeaz, 2020rako finkatu genuena. Gaur egun, IKEA-ko produktuek erabiltzen duten zuraren % 98ek baino gehiagok FSC-ren ziurtagiria dute edo birziklatuak dira.

Nekazaritza ez jasangarriaren, azpiegituren hedapenaren eta zuhaitzak legez kanpo moztearen ondorioz, munduko basoen eta inguruko ekosistemen gain presioak gora egin ahala, ikuspegia orokorragoa hartu beharra dago baliabide garrantzitsu horiei laguntzeko, datozen belaunaldiei begira. IKEA-ren 2030erako Baso Agenda Positiboak zenbait proposamen egin ditu: basoen kudeaketa hobetu, biodibertsitatea handitu, klima-aldaketa arindu eta basoen beharra duten pertsonen eskubideak eta beharrak aintzat hartu hornidura-kate osoan eta berrikuntza bultzatu zura modu azkarragoan erabiltzeko. Agenda hiru arlo nagusitan oinarritu da: • Munduan zehar basoen kudeaketa arduratsua arau egitea. • Deforestazioa gelditzea eta paisaia andeatuak berriz basotzea. • Berrikuntza bultzatzea zura modu argiagoan erabiltzeko, hasieratik, produktu guztiak diseinatuz berrerabiliak, berregokituak, berrekoitziak eta, ahal bada, birziklatuak izateko.

Urte askoz, IKEA enpresekin, gobernuekin, talde sozialekin eta gobernuz kanpoko erakundeekin elkarlanean aritu da basoen andeatzeari eta deforestazioari aurka egiteko eta modu arduratsuan kudeatutako basoetatik hartutako egurraren eskuragarritasuna handitzeko gure hornidura kate propiorako eta beste batzuetarako. Munduko baso kudeaketa hobetzeko eta egurraren hornidura arduratsua industrian ohiko bihurtzeko bidean gaude, baso paisaia erresilienteak sortze eta biodibertsitatea hobetze aldera.